聞西──一炒金瓜米粉 憶起廚房話事人

相信每個家庭都有佢哋自己嘅comfort food，我細個嗰陣阿嫲經常都會煮湯米粉做午餐，炒米粉就間中先會出現一次。到我識煮嘢嘅時候先知道，原來炒米粉係好鬼攰㗎，因為要不停咁用鑊鏟同筷子係咁炒，整鬆啲米粉食落先會乾身爽口，難怪阿嫲會捨難取易啦，哈哈！

近排天口無乜胃口，最啱就係食炒米粉喇，今次嚟個特別版本：金瓜炒米粉，呢個充滿古祖味嘅炒米粉絕對係陪住好多台灣小朋友成長嘅食物。所謂金瓜其實即係南瓜，台灣人鍾意將南瓜切件或者切絲加入米粉一齊炒，軟腍香甜嘅南瓜蓉融入米粉當中，顏色好睇之餘，米粉吸收晒南瓜嘅香甜味同水份，食落順滑爽口又唔乾身。配料通常會用冬菇絲、蝦米、肉絲等，其實又冇乜所謂嘅，家庭主婦最叻就係有乜煮乜，只要好食就得啦。

話明金瓜炒米粉來自台灣，當然要用返台灣嘅新竹米粉，好多超市都有得賣。新竹米粉屬於細米粉，質感幼細富有彈性，無咁容易斷開，所以煮之前要用鉸剪稍為剪開。今次我加咗薑黃粉，除咗令炒出嚟嘅米粉顏色更金黃之外，有研究指薑黃對身體好有益，例如可以抗炎、抗老化、降低膽固醇、預防心血管疾病等。呢個炒米粉喺街食唔到㗎，因為佢有陣我家嘅味道！

材料：

新竹米粉 200g

南瓜 200g

蝦米 30g

土魷 30g

雲耳 10g

大香菇 2隻

椰菜 150g

細甘筍 1條

蔥段 適量

蒜蓉 1湯匙

調味：

薑黃粉...1大湯匙

胡椒粉....1/4茶匙

豉油.............適量

做法：

1. 南瓜去皮切件，隔水蒸20分鐘，然後加50ml水，用食物處理器或攪拌機打成蓉。

2. 處理其他材料：香菇、土魷、雲耳浸軟後切絲，蝦米浸軟，椰菜及甘筍切絲，新竹米粉用凍水浸軟。

3. 先爆香蝦米、土魷及蒜蓉，然後落冬菇絲及雲耳炒香。之後落埋椰菜絲及甘筍絲炒至軟身。

4. 加入南瓜蓉炒勻，再落200ml水，就可以落米粉及薑黃粉。將爐火較細，用鑊鏟同筷子將所有材料同米粉炒勻，直至見到米粉收水乾身，再落豉油及胡椒粉調味。最後，加入蔥段炒勻就食得，如果落少少油蔥酥會更加香口。

【小貼士】

1. 用易潔鑊容易控制唔黐底。

2. 新竹米粉用凍水浸軟就煮得。