聞西──鵝芥冬瓜湯飯 有米加底厚 引人口水流

真係頂唔順喇，日日都三十幾度熱「暑」人咩！熱到口淡淡乜胃口都冇晒，呢個時候最好嚟一碗湯飯，以前食親湯飯我都有少少做壞事嘅感覺，因為阿嫲都會話唔好咁食啦會好傷胃㗎！咁阿嫲又講得無錯嘅，多數人食湯飯嘅時候都會省略咗「咀嚼」呢個消化程序，易入口就直接吞落肚啦。當缺乏咗牙齒切斷、研磨，食物留喺胃部嘅時間就會延長，等於加重胃部嘅負擔，而家食湯飯我都會提醒自己𡁻多幾吓，咁就唔怕傷胃。

食湯飯未必一定會傷胃，但煮湯飯就一定要有個好嘅湯底！今期分享嘅「鵝芥冬瓜湯飯」食譜，係一個充滿東南亞味道嘅湯飯。其實我參考咗冬蔭公嘅煮法，不過就走酸走辣，另外再加入一款喺東南亞料理中經常用嚟煮湯嘅香料「鵝芥」，亦有人叫佢做「越南芫荽」。鵝芥含有芳香成分「脂肪醛」，因而會散發出一種好獨特有啲似芫荽嘅香味，有興趣嘅朋友可以喺賣泰國食品嘅舖頭買嚟試吓，但如果你唔係愛荽之人，咁就唔好試喇。

夏天嘅湯飯又點少得當造嘅冬瓜呢！冬瓜本身好清甜又水分多，留意煮得太耐瓜肉會腍晒冇晒口感，想保持冬瓜外軟內爽，首先就唔好煮得太耐。另外記得要切大件啲，瓜肉冇咁容易腍滋滋喇。老實講，呢個湯底配乜嘢材料都係咁好味，真心推介畀大家啦！

材料：

冬瓜.....................1斤

中蝦....................半斤

蕃茄.....................2個

草菇...................150g

乾蔥頭.................2個

蒜頭.....................8粒

香茅.....................2枝

檸檬葉.................6片

南薑.................1小嚿

鵝芥.............2至3棵

水......................800ml

白飯.................1大碗

調味料：

魚露.................2湯匙

茄膏.................1湯匙

蠔油.................1湯匙

泰國辣醬..........1湯匙

（全部拌勻）

做法：

1. 冬瓜洗淨去瓜皮去瓜囊，然後切件；蕃茄切件，草菇洗淨切半。

2. 如圖處理好乾蔥頭、蒜頭、香茅、檸檬葉、南薑、鵝芥；中蝦剪去觸角及蝦腳，切斷頭部，蝦身開邊後清除蝦腸。

3. 鐵鍋落油及乾蔥頭、蒜頭、香茅、檸檬葉、南薑、蝦頭再開中火爆香，然後加入水份，滾起計轉細火冚蓋煮10分鐘。之後撈起蝦頭及香料，蝦頭留用。

4. 轉中火落冬瓜件煮3分鐘，然後順序落草菇、蕃茄、蝦身、蝦頭及調味料。之後再煮3分鐘，落埋鵝芥就可以熄火，食之前將白飯加入湯中就大功告成。