聞西──茴香紫蘿牛肉 經典酸甜賀凱旋之劍

今期介紹一個應該俾大家遺忘咗嘅餸：紫蘿牛肉，呢個經典菜式味道酸酸甜甜好啱夏天食，而且算係一個難度分好低嘅餸。餸名中嘅「紫」、「蘿」分別代表兩種材料：子薑和菠蘿，我見好多食譜都會用醃製嘅甜酸子薑，即係我哋成日見到粉紅色嗰種，但我覺得夏天子薑當造，無理由唔食新鮮嘅，將子薑切薄啲就可以減輕辣味，當然顏色冇醃製嘅甜酸子薑咁靚啦！

菠蘿我會選擇用新鮮嘅，因為天然水果嘅香味係罐頭菠蘿冇得比㗎，咁又唔使買成個菠蘿嘅，超市切好嘅水果盤係一個幾好嘅選擇，用剩就當生果食埋佢。子薑嘅清香同菠蘿嘅芳香，絕對係呢個餸嘅靈魂！今次我加多一種食材，為紫蘿牛肉增添一份異國風味：就係茴香喇。茴香通常用喺西餐多，多數由外國入口，本地街市比較少見，無論外形或者口感都有啲似洋蔥，味道甘甜，口感爽脆，生食、熱炒、燉煮、烤焗樣樣都得，茴香葉可以作香草或者炒蛋，莖部及最外層通常都唔食，留返用嚟煮上湯就最啱，食得唔好嘥嘛！

至於牛肉，我就用咗超市預先切好嘅急凍和牛牛柳片，要買有少少厚度嗰種，解凍之後切幾刀就搞掂，快靚正！醃肉嘅時候落多啲油就唔會黐埋一舊。傳統上紫蘿牛肉會用糖醋汁埋芡，但我覺得調味要less is more先可以好好欣賞今次嘅食材原味道。

材料：

茴香..................1個

子薑...................80g

大紅椒..............1隻

新鮮菠蘿件......150g

急凍牛柳片......200g

蒜頭..................4粒

醃料：

蠔油、生抽、糖、清水各2茶匙，粟粉1茶匙、油2湯匙

做法：

1. 茴香切去根部及莖部，纖維較老嘅外層可以唔要，之後切開一半再切成薄片。茴香葉搣碎備用，子薑刮去外皮然後切薄片，大紅椒及菠蘿同樣切件。

2. 急凍牛柳片解凍，用廚紙印乾血水，然後切成小塊，落醃料拌勻，蒜頭切片。

3. 白鑊慢火炒香菠蘿及子薑，盛起，唔使洗鑊再落油將茴香片炒至半透明軟身，盛起，再落油爆香蒜片及牛肉。

4. 紅椒片、茴香片、子薑片及菠蘿全部回鑊，轉大火快速炒勻，落少少鹽調味就可以上碟。最後，撒上茴香葉就完成喇。