聞西──印尼粟米餅 老少「鹹」宜證明撈得掂

正所謂粒粒皆辛苦，不過我講緊嘅唔係白米，而係栗子同粟米。我細個嗰陣，屋企嘅小食都比較簡單，冬天阿嫲會焗栗子，因為連殼焗，旁邊會放定揼槌仔，阿嫲講到明要食就要自己揼爛個殼，有時唔小心會揼親手仔，有時又會揼到粒栗子散晒，諗返轉頭都係一種訓練！夏天粟米當造，阿嫲會將粟米烚熟，稍為灘涼就食得，我習慣用手將粟米粒逐粒搣出嚟食，食完隻手同口都會攰到無朋友！

講起粟米，好耐之前我喺一個老友屋企食過一個印尼小食Dadar Jagung，大家都叫佢做印尼粟米餅，初初以為材料只係粉漿撈埋啲粟米粒就搞掂，後來無意中睇到一條由印尼姐姐教整DadarJagung嘅短片，先知道呢個小食其實唔係咁簡單。呢位印尼姐姐話佢哋家鄉有賣調好味道嘅粟米餅麵粉，不過始終唔及自己調配咁好味同脆身。

東南亞菜式好多時候都會用到石盅，將香料例如辣椒、蒜頭、乾蔥頭等舂碎會更加容易出味，同時又保留到食物嘅纖維。宜家石盅連鎖傢俬店都有得賣，無石盅都可以用食物處理器代替嘅，不過口感真係會差好多。將粟米粒輕輕舂碎目的係等啲粟米汁同粉漿混合，味道就會更加均勻。呢個印尼粟米餅鹹中帶甜、甜中帶辣，炸起即食脆卜卜，隔日食就煙煙韌韌，做小食或者伴菜都咁適合。

材料：

粟米..................1大條

蝦米......................15g

芫荽......................1棵

檸檬葉..................4片

蒜頭......................4粒

乾蔥頭..................1個

紅辣椒仔......2至3隻

水.....................200ml

粉類材料：

麵粉...................1/2杯

自發粉...............1/3杯

粘米粉...............1/3杯

調味料：

鹽......................1茶匙

魚露..................1茶匙

胡椒粉...........1/4茶匙

器具：石盅及糧杯

做法：

1. 蝦米浸軟洗乾淨，紅蔥頭、蒜頭去衣，檸檬葉除去葉梗切幼絲，紅辣椒仔切粒。上述材料全部放入石盅舂爛成蓉，芫荽切碎。

2. 粟米去衣洗淨，先切開兩半方便放平，然後用刀垂直切出粟米肉。將一小杯粟米放入石盅舂破，粟米粒唔使舂得太碎，要食到粟米粒嘅質感，然後倒出再逐少將餘下粟米粒舂破。

3. 麵粉過篩後加入調味料拌勻，先加入100ml水拌勻，然後再加餘下嘅100ml水拌成順滑粉漿。

4. 將粟米材料和芫荽碎加入粉漿拌勻，炸鍋下油加熱至油溫180度左右，放入木筷子試試油溫，如果木筷子周邊起泡泡就代表可以開始炸喔！用湯匙將適量粟米粉漿放進熱油鍋，炸至兩邊金黃色，最後用大火逼出油後就可以夾起上碟。