聞西──濕奶油鹹蛋黃蝦 中式fusion鮮甜到家

最近有人咁講：全世界無一個地方蒸魚夠香港蒸得好！的確蒸魚好似好簡單，但實際上唔同品種嘅魚、大細、蒸法都會直接影響魚嘅味道，所以話呢香港嘅廚師真係好叻㗎！有時去旅行都會心思思想去食海鮮，不過有啲地方淨係識得將啲海鮮烚熟或者炸脆，覺得浪費咗啲海鮮囉。

前排去馬來西亞沙巴玩咗幾日，出發前做定功課，必食當然係貓山王榴槤，仲要係樹上熟，真係零舍不同！另外非常推薦當地嘅海鮮，三個字：平靚正。原來當地有好多華人，我幫襯咗兩間海鮮餐廳老闆都係華人，用中式煮法烹調，係香港人食開嘅味道，質素同價錢都好令人滿意。其中有味「濕奶油鹹蛋黃蟹」簡直驚為天人，個汁好似芝士龍蝦伊麵，不過因為加咗鹹蛋黃、咖喱葉、紅辣椒，味道層次豐富。鹹香鮮甜同時帶有濃濃奶香，好有中式fusion菜嘅感覺，就好似香港廚師咁融會貫通中式同各地菜式食材風味，創造出香港獨特嘅飲食文化。

仍然懷念濕奶油鹹蛋黃蟹嘅滋味，試吓還原，不過香港好難買到新鮮咖哩葉，好彩C字頭超市可以買到乾咖哩葉代替。今次唔煮蟹，近排啲海蝦超抵食，由於要將啲蝦走油，記得蝦頭前段包括蝦眼都要剪去，因為蝦眼含水份多，炸嘅時候好易爆炸彈油，小心小心！

材料：

中蝦.............................................1斤

鹹蛋黃.........................................6粒

乾咖喱葉.........................................1g

紅辣椒..................................2至3隻

蒜頭.............................................6粒

牛油..............................................50g

粟米油..........................................50g

芝士..............................................50g

大淡奶..............................一罐410ml

大紅椒絲及芫茜段......適量（裝飾用）

饅頭（拌食）

調味：

糖..............1湯匙

魚露..........1茶匙

鹽.................適量

做法：

1. 鹹蛋黃隔水蒸15分鐘，然後用叉壓成幼滑嘅鹹蛋蓉，準備埋其他配料：蒜蓉、紅辣椒粒、大紅椒絲及芫茜段。

2. 處理中蝦，就係將蝦頭前段包括蝦眼剪去，蝦身開邊後除去蝦腸。洗乾淨再用廚紙印乾，撲上粟粉，放入滾油炸致金黃，之後順便炸埋饅頭。

3. 凍鑊落粟米油及牛油，開慢火煮溶牛油，再將蒜蓉、紅椒粒及乾咖喱葉落鑊炒香。之後，加入鹹蛋黃蓉慢慢炒至膨脹起泡。

4. 加入淡奶繼續慢火煮滾，落芝士煮至溶化就可以調味及試味。將蝦回鑊炒勻，煮至稍為收汁，最後落大紅椒絲及芫茜段裝飾就搞掂。