聞西──蝦膠釀茄子卷 花開富貴 蛇年強勢

立春之後正式踏入蛇年，首先恭祝大家蛇年行好運、四季平安、身心健康！新年除咗食糕拜年逗利是之外，相信更多朋友仔會選擇一家大細去旅行行大運。有身在泰國曼谷嘅朋友仔話我知，當地嘅過年氣氛比香港有過之而無不及，每個商場都有新年裝飾又有舞獅表演，的確有好多地方同樣有慶祝農曆新年嘅習俗。

韓國人喺正月初一朝頭早，就會按長幼順序向長輩磕頭跪拜問候逗利是。韓國人嘅利是叫「歲拜錢」，利是封竟然係白色，唔止咁，韓國人新年仲會食白雪雪嘅切片年糕湯。據說當地白色代表純潔，寓意新一年有個好開始，不過中國人就肯定會話大吉利是囉！

馬來西亞嘅華人農曆新年必定會食「撈起」。撈起通常會以切成絲嘅蔬菜，再配魚生同其他配料，淋上醬汁後大家就一齊用筷子一邊攪拌材料，一邊講啲吉利嘅說話，原來筷子夾得愈高愈代表好意頭，下次食撈起嘅時候可以試試喇。

喺過年嘅時候，意頭好緊要，好多菜式都會賦予吉利嘅餸名，那怕你睇完個餸名都唔知係咩嚟。就好似我今期介紹嘅「花開富貴」，其實係用蝦膠及茄子，再加上十足嘅心機及祝福，做出朵朵靚靚嘅花，作為賀年菜式或者拜年時招呼親友嘅點心都咁適合，相信收到嘅利是都會大封啲啦！恭喜恭喜！

材料：

大茄子....................1條

蝦仁.....................300g

甘筍.......................1條

小旺菜....................2個

芫荽.......................1棵

調味料：

胡椒粉............1/2茶匙

鹽及麻油........1/2茶匙

粟粉...................1茶匙

做法：

1. 先將蝦仁去腸，洗乾淨後用廚紙印乾水分，放入食物處理器，同時加入調味料及芫荽碎攪拌成蝦滑，再轉至大碗撻至起膠（亦可用菜刀將蝦仁剁成蝦膠）。然後放入密實袋做成嘅擠花袋，擠花袋角位剪開一個1cm嘅決口。

2. 小旺菜分開一片片，放入滾水灼半分鐘撈起攤凍。準備蒸籠或碟，將旺菜平均鋪上蒸籠，甘筍則去皮切成薄片。

3. 茄子去蒂後切成圓形薄片，由於「每朵花」需要4片茄子，將茄子片切半，8片半圓排成一直線，每片半圓茄子要重疊少少，茄子半圓嘅底部擠上一條長長嘅蝦膠。然後，慢慢捲起成為花形狀，蝦膠就好似漿糊咁將茄子片黐實定形。

4. 攞一片甘筍喺上面擠少少蝦膠，再將茄子花放喺上面，然後整齊放入蒸籠，用大火蒸15分鐘，取出後掃上麻油，食之前淋上少少豉油調味。

【小貼士】

1. 茄子最好揀粗大嗰啲，茄子片唔好切得太厚，否則好難捲成花形。

2. 想蒸出嚟嘅茄子保持紫色，一定要水大滾後先放入茄子去蒸，仲要全程要用大火啊