聞西──打拋乾炒豬通 鑊氣爆出色香味

過往泰國都係香港人嘅旅遊熱點，不過近排因為緬甸電騙園衍生咗人生安全嘅問題，連帶到泰國旅遊業都受到影響。我本來都買好機票三月去曼谷，不過考慮到長輩嘅擔心，最後都係決定畀手續費取消機票，估唔到我都會間接成為電騙園嘅受害者:(

去曼谷重中之重，就係為咗食正宗嘅泰國菜，雖然香港都有好多泰國菜選擇，不過因為食材問題，味道始終都係差咁啲。就好似泰國國民料理「打拋豬肉飯」咁，材料當中有一樣好重要嘅香料叫「打拋葉」，或者因為供應問題，好多香港泰國餐廳都會用九層塔代替，煮出嚟嘅味道當然有所分別啦。其實打拋葉都係羅勒family嘅成員，泰文叫做（Kapaw）聖羅勒，因為發音近似中文「打拋」，後來就直接翻譯成「打拋葉」喇，打拋葉嘅葉呈橢圓形，葉邊有明顯鋸齒狀，枝同葉上面都有細毛，味道就無金不換咁濃烈，帶少少丁香、薑黃風味。

打拋豬通常會配白飯，今次搞搞新意思用嚟炒，要炒到好有鑊氣嘅色水真係全靠支黑醬油，通粉吸晒啲香味、調味，真係色香味俱全！如果唔用免治豬肉，肉片、雞件、海鮮一樣得，留意免治豬肉唔需要預先調味，最後煎隻太陽蛋放喺面就perfect啦！

材料：

免治豬肉.........................200g

青豆角.............................100g

打拋葉...............................1紮

蒜頭..................................4粒

乾蔥頭...............................2個

檸檬葉...............................2片

紅辣椒...............................2隻

泰國辣椒仔.......................6隻（怕辣可以減半）

卷通心粉.........................180g

雞蛋..................................1隻

調味料：

黑醬油............................3茶匙

生抽...............................3茶匙

糖...................................1茶匙

做法：

1. 煲一公升水，水滾後加1茶匙鹽及1湯匙油，中火煮熟意粉撈起（可按意粉包裝袋提議時間煮熟意粉）。打拋葉摘去葉及嫩莖，連同檸檬葉浸水15分鐘，之後沖洗乾淨用廚紙印乾。

2. 準備其他配料，如紅辣椒切片，泰國辣椒仔切粒，蒜頭及乾蔥頭剁碎，檸檬葉去除葉梗再切成幼絲、豆角切粒。

3. 凍鑊落油、蒜蓉及乾蔥蓉，開中火爆香，之後落免治豬肉炒熟，再落青豆角粒、生抽及糖炒勻。

4. 落通心粉、黑醬油炒至上色，再加入紅椒粒及紅椒片，轉中大火炒香，熄火落埋打拋葉炒勻上碟。最後，將太陽蛋放喺面就完成。