聞西──焗釀鮑魚 滋味滋陰 Creamy醒神

今次分享呢個「焗釀鮑魚」，係我近排喺一個婚宴食過嘅菜式，呢餐戥一對新人高興之餘，好開心遇到一間啲出品咁正嘅酒店（中環區），畢竟之前有過太多難食嘅婚宴經歷，當晚樣樣都好食，其中一道外形「好似」焗蟹蓋嘅餸特別有驚喜。原來係好少見嘅焗釀鮑魚，不但餡料充滿海洋味道，口感亦相當creamy，三爬兩撥就畀我消滅咗喇，唔夠喉一於返屋企試吓整先。

香港街市最常買到嘅三種新鮮鮑魚，包括大連鮑、南非孔雀鮑及澳洲翡翠鮑，大連鮑經濟實惠，不過我覺得佢肉質偏硬，唔係好適宜做呢個餸。南非孔雀鮑無論頭數、味道都係最好嘅，但唔係成日有得賣，價錢都係最貴，所以我會揀澳洲翡翠鮑，佢嘅肉質比較軟身，近年供應穩定價錢唔算太貴，今次喺元朗大橋街市買嘅咁大隻都係38蚊隻咋！

至於洗鮑魚好多人都會直接用牙刷就咁刷隻生猛鮑魚，不過呢個做法原來係錯嘅，因為鮑魚受到刺激肉質會收縮變韌，我嘅做法係將鮑魚放入已經熄火嘅滾水浸半分鐘，然後撈起沖凍水降溫，之後就可以用刷刷乾淨，啲黑蚊蚊嘅污漬同鮑魚嘅黏液都會好容易清除。今次加咗啡色嘅金菇等啲餡料更豐富口感更順滑，另外要記住餡料要煮到夠杰身，如果唔係焗出嚟就會水汪汪㗎喇。

材料：

大隻澳洲翡翠鮑.......4隻

洋蔥................半個100g

金菇.......................100g

牛油.........................25g

牛奶.........................50g

鮮忌廉...................80ml

麵包糠....................適量

蛋黃.........................1隻

調味料：

魚露......................2茶匙

胡椒粉...............1/4茶

做法：

1. 先處理鮑魚，將鮑魚放入已經熄火嘅滾水浸半分鐘，然後撈起沖凍水降溫。之後，用刷刷乾淨、除去內臟及剪去上方嘅胃管，鮑魚殼同樣要刷乾淨，再放入滾水煮3分鐘消毒。

2. 鮑魚肉、洋蔥及金菇切細粒，準備好其他材料就開始煮。

3. 準備易潔小鍋燒熱落油，用慢火先將洋蔥粒炒至軟身，然後落金菇及牛油炒香，之後放埋鮑魚粒炒勻。

4. 順序加入鮮奶、鮮忌廉、蛋黃及調味料，慢慢煮至收水至杰身，其間要不停攪拌。餡料煮到夠杰身後釀入抹乾咗嘅鮑魚殼，面頭撒上麵包糠，放入200度預熱焗爐焗至表面金黃就完成。