聞西──梅香魚鍋 好味開胃「酸」之於口

每年5至6月都係青梅當造季節，相信大家身邊不乏有朋友突然化身做「浸」酒師喺屋企自釀梅酒。通常等一兩年後，啲酒就可以開封享用。夏天我最鍾意梅酒加冰或梅酒梳打，冬天就會用水將梅酒「坐」暖嚟飲，呷一小口順喉又暖胃！不過今日唔係教大家點樣釀梅酒，而係用日本酸梅煮餸。

酸梅喺日本飲食文化中，佔一個好重要嘅地位。睇日劇會發現日本人鍾意喺便當中間放粒酸梅，我初初唔明以為佢哋無錢買餸，哈哈！之後先知靚嘅酸梅原來一啲都唔平，喺日本酸梅都係一種養身食物，根據資料顯示酸梅可以消除疲勞、促進食慾、防止胃潰瘍、醫治腹瀉、嘔吐等功效。酸梅雖然有個酸字，但為咗遷就現代注重健康嘅飲食習慣，而家啲酸梅喺醃製時大多已減鹽，部分仲會加入蜂蜜浸泡變得更容易入口。

梅香魚鍋食譜靈感來自梅漬茶泡飯，我將酸梅壓成蓉加入湯汁做調味，帶有果香嘅酸味好開胃，魚鍋主角當然係魚，之前試過用龍躉片，魚味同湯汁勁夾，可惜今次放工後去超市已冇新鮮魚可選擇，唯有用急凍魚柳代替，急凍魚柳炸過無咁容易散開。至於其他配菜就自由配搭啦，炸過嘅蒜頭真係好香，食落又甜又粉，記得留返啲蒜油煮嘢呀。

材料：

魚柳.............300g

蒜頭.............15粒

鮮菇...............4隻

粟米仔.........100g

西蘭花.........100g

芋絲.............100g

紫蘇葉...........8片

水...............500ml

醃料：

蛋黃.............................1隻

粟粉..........................2茶匙

魚露..........................1茶匙

胡椒粉、鹽........各1/4茶匙

調味料：

日本酸梅............2粒

豆瓣醬...........2湯匙

蠔油...............2湯匙

糖...................2茶匙

做法：

1. 急凍魚柳解凍，洗淨後用廚紙徹底吸乾水分，切件加入醃料醃15分鐘，再炸成金黃色（如果用新鮮魚就唔使炸啦）。

2. 蒜頭去皮後用慢火炸成金黃色，另外準備芋絲、粟米仔、西蘭花、鮮冬菇等配菜，並全部飛水，尤其係芋絲要咁整先除到嗰陣怪怪嘅味道。

3. 紫蘇葉切碎、酸梅壓成蓉，瓦煲落油、炸蒜頭、豆瓣醬及蠔油，然後開中火炒香，加入500ml水，煮滾後加入酸梅蓉，試味。如果唔夠酸，可以再加酸梅蓉調味。

4. 將配菜及魚件全放入瓦煲，滾起計煮多3分鐘，最後撒上紫蘇葉碎就食得。