聞西──雞頭米節瓜脯 春濕byebye 清甜我buy

冬去春來呢段時間，南方人傳統上會叫做回南天。講起回南天，大家即時會諗起電梯大堂啲瓷磚出晒水，啲衫晾極都唔乾嘅畫面。近排唔少人提及回南天要小心飲食，到咗回南天身體容易積聚濕氣，好容易令到我哋嘅腸胃虛弱，有時仲會覺得頭重重周身骨痛添，想同春濕講bye bye？可以試吓今期嘅主角「雞頭米」。

究竟雞頭米係乜東東呢？佢又有水中人參之稱，中醫師話佢可以健脾去濕、固腎止瀉，而且老少咸宜，開估喇！佢就係新鮮嘅茨實，資料顯示雞頭米係睡蓮科植物芡嘅成熟種子，當佢哋嘅花謝咗之後，花萼就會慢慢膨脹，最後生到好似雞頭樣嘅果球。果球裏面裝住好多啡色嘅小粒粒，再剝皮之後就係白雪雪嘅新鮮茨實。

平時用嚟煲湯嘅茨實都經製作過，質感又硬又實，而新鮮嘅茨實口感有啲似薏仁，好有咬口，味道清甜。不過，就唔係咁多地方有賣，我喺一間專賣菇菌嘅專門店買，另外有啲網上商店都有賣。今次清清哋用嚟做節瓜脯，我用浸菇浸瑤柱嘅水將節瓜煮腍，就咁食已經清甜無比，配料有雞頭米、瑤柱、冬菇、舞菇、叉燒，口感非常豐富，夏天又可以將節瓜改為冬瓜，雞頭米仲可以用嚟煮湯、炒菜、煲糖水。記住用唔晒要放入冰箱保存。

材料：

節瓜..........................400g

雞頭米........................80g

已浸軟冬菇.................60g

叉燒............................60g

舞菇............................60g

已浸軟瑤柱.................40g

雞湯........................250ml

調味料：

紹酒........................1湯匙

蠔油........................2湯匙

糖............................1茶匙

胡椒粉......................少許

做法：

1. 節瓜去皮切半後放入平底鑊，加入浸菇同浸瑤柱嘅水仲有冬菇蒂，慢火煮30分鐘。中途可以調整水分，煮好後移至深碟。

2. 準備其他材料：瑤柱撕成絲，叉燒、冬菇、舞菇切粒，雞頭米解凍後用滾水煮4分鐘瀝乾備用。

3. 燒熱鑊落油，將瑤柱撕絲、叉燒、冬菇、舞菇粒爆香，落調味料炒香。

4. 加入雞湯及雞頭米，煮5分鐘至材料熟透入味就打個薄芡。最後，將材料淋上節瓜上面就完成。