聞西──鄉情濃厚龍船丁 一碟真「切」動人

仲有唔夠一個月就到端午節，除咗食糉之外，大家又有冇聽過食「龍舟飯」呢？原來喺廣東好多地方，食龍舟飯都係端午節必備嘅傳統習俗。相傳龍舟飯本來係為咗參加龍舟比賽嘅健兒們而準備，大家勤於練習為咗慳時間都會喺船上面食飯，不過船會搖晃始終唔係咁方便，當時嘅人就諗到將餸同飯撈埋一齊方便食啲。就係咁，後來演變成龍舟比賽後鄉親父老一齊食飯嘅傳統習俗。

基本上每條村嘅龍舟飯都各有自己特色，通常都係九餸一湯，其中兩味餸係必不可少，包括脆皮燒豬同埋今日嘅主角「龍船丁」。原來燒豬係龍舟比賽前八名嘅必備獎品，活動中亦有競投燒豬肉嘅習俗，寓意將好運健康帶返屋企，至於龍船丁又係乜東東呢？其實有啲似炒粒粒嘅做法，主要材料有豆角、菜脯、青辣椒、炸花生等，除咗開胃易送飯，據說可以去濕氣驅除疲勞添。

見到個「丁」字就知全部材料都要切粒粒，呢個餸真係好香，香味來自青辣椒，青辣椒要揀啲冇咁辣嘅，避免搶去其他配料嘅味道。菜脯煮之前，要浸水去除醃製時過多嘅鹹味，5至6月正係豆角當造，鍾意爽口嘅朋友可以改用青豆角。至於炸花生，我就選擇用現成嘅代替，慳番好多工夫嘛，其實材料分量都好隨心，最緊要大家聚埋食得開心！

材料：

豆角........................300g

青辣椒.....................100g

蝦仁........................150g

菜脯..........................80g

罐裝花生...................80g

大紅椒.......................1隻

蒜蓉.......................2湯匙

醃料：

粟粉.......................1茶匙

麻油.......................1茶匙

胡椒粉......................少許

調味料：

蠔油.......................2湯匙

糖...........................2茶匙

鹽.............................適量

做法：

1. 菜脯泡水15分鐘去除鹹味，蝦仁洗乾淨用廚紙印乾水分後切粒，落醃料醃15分鐘。

2. 豆角、青辣椒、蝦仁、菜脯、大紅椒全部切粒，另外準備蒜蓉。

3. 中火起鑊落菜脯爆香，然後加入蝦粒及蒜蓉炒香，再落調味料及豆角，炒至豆角8成熟左右。

4. 加入青椒粒及紅椒粒，翻炒半分鐘就可以熄火。最後倒入花生拌勻上碟。