聞西──消暑川味豆魚 腐皮捲住開心些芽

春吃芽、夏吃瓜、秋吃果、冬吃根，有中醫指春天食芽菜可以解春困。提起芽菜，記得以前小學曾經有個習作就係種芽菜，老師分派每人一隻膠杯、十零粒綠豆、少少棉花，返到屋企按老師指示，洗乾淨啲綠豆，將棉花放入膠杯，然後淋少少水，再平均放啲綠豆喺棉花上面，然後放喺一個比較陰暗及通風嘅地方，第二日就發芽，大約四日已經變成長長嘅芽菜，當時覺得好神奇，亦係我唯一種芽菜嘅經驗，哈哈！但係講到搣芽菜我就經驗豐富，以前街市未出現銀芽之前（即係已經去除頭尾嘅芽菜仔），每次阿嫲煮芽菜仔都會叫我幫手搣芽菜（搣咗啲根），一邊搣一邊聽阿嫲話當年，就係我嘅快樂時光！

今日介紹嘅餸都同芽菜有關係，叫做川味豆魚，雖然有個魚字，但其實材料係無魚嘅，豆魚起源自以前嘅四川，因為內陸唔容易有新鮮海鮮，當地人就將外形好似魚仔嘅芽菜仔當成魚，仲將呢個餸命名為「豆魚」。用腐皮包住烚熟咗嘅芽菜，然後捲成條狀，煎香後切件，再配川式涼拌麻醬汁，口感非常清爽，芽菜清甜爽口多汁！我覺得芽菜用炒好食過烚，但記住炒芽菜一定要猛火熱油，不停翻炒，唔好加糖，唔好過早加鹽，否則愈炒愈多水出。除咗芽菜我仲加咗雲耳、唐芹及甘筍，食落冇咁寡，涼拌麻醬汁好好味，可以用嚟做冷麵，加啲青瓜絲，又係一道消暑嘅妙品！

材料：

腐皮.............................1張

銀芽...........................12両

乾雲耳..........................6g

芹菜（淨係要莖）.......2棵

甘筍絲........................30g

涼拌麻醬汁材料：

芝麻醬..............90ml

白醋................1湯匙

蒜蓉................1湯匙

紅油................1湯匙

麻油................2茶匙

豉油.............1.5茶匙

糖....................1茶匙

做法：

1. 乾雲耳浸軟，連同甘筍及唐芹全部切絲，而甘筍用刨刨絲都可以。大火燒熱鑊落油，油熱立即落芽菜，不停翻炒至軟身盛起。

2. 將雲耳絲、甘筍絲及唐芹絲炒熟，記住都係要大火快炒先可以保持清爽口感。將上述材料連同銀芽撈勻，呢個時候可以落鹽或豉油調味。

3. 圓形腐皮剪成兩半，放適量芽菜餡料，然後好似捲壽司咁將腐皮捲成長條狀，切去兩端，再切開兩段方便煎。

4. 圓形腐皮剪成兩半，放適量芽菜餡料，然後好似捲壽司咁將腐皮捲成長條狀，切去兩端，再切開兩段方便煎。