聞西──宮保馬蹄肉丸 酸甜微辣爆爽脆

近年興起兩餸飯，對好多人嚟講係一個平靚正嘅選擇，好多朋友都話宜家買餸煮飯分分鐘貴過食兩餸飯，唔使煮又唔使洗乾手淨腳！不過港式鑊氣小炒菜式一般都係偏向高油、高脂、高鹽，食得多有可能成為三高肥胖一族。有註冊營養師分享兩餸飯常見菜式嘅卡路里，其中3款人氣之選包括咕嚕肉、魚香茄子及蒸肉餅，全部都屬於高熱量菜式。其中，魚香茄子竟然有1000卡，咕嚕肉都唔弱有950卡，營養師推薦大家揀餸嘅時候要注意平衡最好有菜有肉，蒸煮嘅菜式熱量比較低。下次食this this rice嘅時候，注意一下喔！

好彩我鍾意食嘅宮保雞丁只有480卡，都唔算太高啫。好多人都鍾意宮保雞丁酸甜帶微辣好好送飯，呢種味道又叫「荔枝味」，當然唔係真係用荔枝煮啦，只係形容類似荔枝嘅水果味道。荔枝味同糖醋味最大分別係糖分，糖嘅分量唔可以多過醋，要做到酸味略大於甜味，呢種酸甜味又以鹹味為基礎，所以調味都有一定分量醬油。

宮保菜式一般會用雞髀肉或者蝦，今次我用火鍋猪腩片包住馬蹄粒做成肉丸再炸到金黃，食落馬蹄爽脆口感又幾得意。留意爆花椒嘅時候要用細火，花椒好容易燶產生苦味，就會破壞成碟餸嘅味道喇。

材料：

猪腩片..................300g

馬蹄........................4粒

大蔥........................1條

乾辣椒....................15g

花椒粒................1湯匙

即食腰果或花生......50g

蒜頭........................2粒

乾蔥頭....................1個

醃料：

胡椒粉...............少少

糖.......................少少

鹽.......................少少

紹酒.................1茶匙

生粉（粟粉）.......2湯匙

芡汁：

蠔油................1/2湯匙

豉油..............11/2湯匙

白醋或黑醋......2湯匙

糖.....................2湯匙

水......................60ml

做法：

1. 猪腩片落醃料醃15分鐘，馬蹄一開四切粒，取出一條猪腩片，包住馬蹄粒卷成丸狀，然後用手搓圓。全部完成後，放入雪櫃雪30分鐘。

2. 馬蹄肉丸沾上粟粉，然後炸至金黃色。大蔥切段、乾辣椒剪成小段，將芡汁攪勻。

3. 細火起鑊落油，爆香花椒至出味，取走花椒粒。落一半大蔥及乾辣椒，再落蒜蓉及乾蔥蓉爆香，然後加入芡汁煮滾。

4. 將馬蹄肉丸回鑊，落粟粉水打芡，落埋餘下一半大蔥及乾辣椒。最後，熄火落腰果炒勻就完成。