聞西──古勞麵豉炆豬肉 配角蓮藕夠矚目

「返鄉下」而家變成形容去日本旅行嘅潮語，不過喺我仲係細路仔嘅時候，陪阿嫲返鄉下絕對係一件大事。我鄉下喺廣東鶴山古勞鎮，記得以前交通冇咁方便，經水路要搭船去江門再轉三個鐘頭車先到，經陸路就搭火車再轉車，拎住大包細包行李過海關絕對係一件苦差，不過諗到返到鄉下有好多好嘢食，幾辛苦都值得嘅。

我鄉下最出名嘅特產一定係古勞麵豉，古勞鎮鄰近西江，擁有清澈乾淨嘅水源，喺百多年前已經成為製作醬料嘅重鎮。以前嘅豉油都係天然生曬，至少要三個月時間釀成，唔似而家大規模生產嘅七日鮮，時間咁短真係好極有限。俗語有話無好豉油就無好麵豉，最初麵豉係釀製豉油嘅副產品，醬缸最上層焦黑嘅黃豆先叫古勞豉，所以只有天然生曬豉油嘅醬園先有生產古勞麵豉。真正嘅古勞麵豉要經過充分日照，色澤烏黑明亮、香味濃郁、味道甘甜、鹹淡適中、入口留香，又因為油重水分少，所以唔容易變壞。

以前阿嫲會用古勞麵豉蒸豬肉，麵豉吸收豬油會散發出一份超濃嘅豉香味，阿嫲同蔡瀾一樣都喜愛豬油，就係唔怕肥，最緊要好食囉！今次用古勞麵豉炆五花腩保證你唔會失望，蓮藕爽脆清甜，要切大件啲先食得過癮，鍾意食辣嘅可以放幾隻辣椒一齊炆就更加惹味。

材料：

五花腩............................300g

蓮藕................................500g

乾雲耳..............................10g

薑...................................1小嚿

蒜頭...................................6粒

芫荽蔥.............................適量

醃料：

紹酒...............................1湯匙

油...................................1湯匙

胡椒粉.............................少許

調味料：

古勞麵豉........................2大匙

生抽...............................1湯匙

糖...................................2茶匙

麻油.................................適量

做法：

1. 乾雲耳浸軟，五花腩切件洗淨，落醃料醃15分鐘。

2. 蓮藕切成件，另外準備料頭：薑及蒜頭略拍，蔥頭洗淨，青蔥及芫荽切段。

3. 起鑊落油先爆香料頭，然後落豬肉煎香兩面，加入古勞麵豉炒香。

4. 加入蓮藕及雲耳後，再落生抽及糖繼續炒勻，加水至材料表面，冚蓋滾起計炆半個鐘至收水。最後，落芫荽蔥及麻油兜勻就完成。