聞西──沙葛肉碎生菜包 粒粒鹹香大啖咬

自從政府公布彩虹邨重建計劃，社交媒體多咗好多關於彩虹邨嘅專題報道。其中最多人討論嘅一定係「金碧酒家」，金碧酒家開業至今已經超過60年，當年出世嘅BB都可以攞長者咭！由於成為2028年首批因重建而要離場嘅商戶，前景未明下新舊顧客訂枱急增，而家真係一枱難求，好在前排得好友賜位，終於得償所願食到喇！

金碧酒家嘅裝修屬於香港舊式酒家設計，成間酒樓就好似經典拍戲場景咁，每一樣嘢都充滿懷舊味道，牆身貼滿熟客嘅相，地下嘅紙皮石地磚充滿歷史痕跡。當然，嚟到金碧，港式懷舊菜式先係主角，紅噹噹嘅錦鹵雲吞醬汁絕對係兒時回憶，佢哋個「八珍錦滷雲吞汁醬汁」裡面有叉燒、魷魚、菠蘿、青椒、豬膶等，雲吞皮炸得超鬆脆。魚腸蒸蛋睇落好家常餸，事實上佢哋嘅魚腸做到一啲腥味都冇絕對唔簡單，而且非常新鮮肥美口，送飯一流！蠔豉生菜包真係超級好食，蠔豉鬆炒得極香，裡面有冬菇、沙葛粒，加埋啲炸米粉碎，配埋爽脆生菜胃口大開。仲有好多靚餸未能盡錄，希望大家有機會試吓啦！

今次想試吓整生菜包，知道唔係個個都啱蠔豉，所以改用鹹香味十足嘅土魷、蝦米代替，每樣材料都切到細細粒，唯獨沙葛要切大粒少少， 因為炒完會收水，太細粒會影響口感，記住要炒得夠乾身先惹味㗎！呢個餸除咗配生菜， 用嚟送飯都非常合適。

材料：

沙葛..........1個280g

免治豬肉........200g

冬菇..................2隻

土魷..................2隻

蝦米.................20g

生菜..................1個

乾蔥頭..............1個

蒜頭..................4粒

紅辣椒..............2隻

米粉................適量

蔥......................2棵

調味料：

豉油..............1湯匙

黑醬油..........2茶匙

蠔油..............2茶匙

麻油..............2茶匙

糖..................1茶匙

做法：

1. 冬菇、土魷、蝦米浸軟，揸乾水後切成粒粒，準備料頭：乾蔥蓉、蒜蓉、紅椒粒，蔥切粒，免治豬肉唔需要調味。

2. 沙葛去皮切粒，將米粉搣開及炸脆，留意米粉炸嘅時候會快速膨脹，逐少落鑊會易控制啲。米粉炸好後放入食物袋輕輕整碎，然後放上碟。

3. 中火起鑊落油先爆香土魷，然後加入豬肉炒鬆，再落料頭及冬菇粒炒香。

4. 加入沙葛粒及調味料，繼續炒至乾身，見到沙葛粒縮細咗及其他材料夠乾身，感覺超有鑊氣就差唔多。最後落埋蔥粒炒勻就可以熄火，將粒粒放落炸米粉上面就完成。

【小提示】

留意生菜要預早洗乾淨風乾水呀。