聞西──奶油椰菜薯蓉 焦香爽滑滋味濃

有人話香港人防災意識薄弱，打大風一家大細走去岸邊觀浪，又有人話香港人打風先嚟食菜，去超市街市搶住買菜，直至貨架空空如也，但其實香港打風頂多都係一至兩日，無乜必要囤積蔬菜或者食物，況且葉菜類保鮮期有限，食唔晒就浪費啦！真係要買我會揀椰菜、旺菜等耐放嘅蔬菜，打完風都仲可以慢慢食埋佢。

今次分享嘅奶油椰菜薯蓉，整個菜式分為三部分，就係椰菜、薯蓉、同奶油汁。蔬菜一般唔係白灼就係炒，大家又有無試過煎呢？之前喺一間西餐廳食過一道羅馬生菜沙律，特別嘅地方係啲羅馬生菜煎到有啲焦香，令到味道更加豐富，同樣嘅做法今次用嚟煮椰菜，我鍾意保留椰菜爽脆嘅口感，快速煎香後加少少豉油同水焗一陣，口感就至理想！

薯蓉就用水煮一鍋到底方式處理，為咗減少熱量，我用煮薯仔嘅水代替牛奶/忌廉，牛油分量亦非常克制，另外煮薯仔時可以落幾粒蒜頭，整出嚟嘅薯蓉會更加香口。有人鍾意極致幼滑嘅薯蓉，我就喜歡保留少少薯粒增加口感。至於奶油汁靈感來自上海菜式：奶油津白，煮法有啲似西式嘅白汁，但又不盡相同，上湯為主再加入牛奶，重點係落金華火腿粒粒，有提味提鮮嘅作用㗎！呢個餸我就當正餐咁食，有唔同嘅口感，夠飽肚又好味，食菜都可以如此多fun啦！

材料：

薯仔..............................3至4個

蒜頭...................................4粒

牛油...................................20g

椰菜...................................1個

牛奶.................................80ml

上湯...............................250ml

粟粉................................2湯匙

金華火腿...............少少（約5g）

做法：

1. 薯仔去皮切件，連去皮蒜頭放入鍋，加水至剛浸住薯仔，落1/4茶匙鹽，中火煮滾轉細火煮15至20分鐘，倒出煮薯仔嘅水備用。用叉壓碎薯仔攪成蓉，趁熱落牛油及逐少加入煮薯仔嘅水，調至理想嘅濃稠狀態，之後冚蓋保溫。

2. 椰菜從根部切開一半，再如圖切成厚件，逐一放入平底鑊煎至焦香。然後加入少少水分及日式豉油冚蓋焗1分鐘，呈半透狀態就可以盛起，金華火腿切成蓉。

3. 細火燒熱平底鑊，落油及粟粉後不停用鑊鏟鏟拌至兩者均勻。之後逐少落上湯，持續鏟拌至順滑，加入牛奶、少少胡椒粉拌勻，落埋金華火腿蓉就完成奶油汁。

4. 將薯蓉平均置於碟中，上面放上煎香嘅椰菜件，最後淋上奶油汁即可。