聞西──臘味芋蓉焗飯 這個冬天不太冷

近排氣溫開始下降，終於可以同炎夏講byebye，涼涼哋特別想食啲飽肚暖胃嘅嘢，就嚟個熱辣辣焗飯啦！我諗香港人食得最多嘅焗飯一定係焗豬扒飯：蛋炒飯底、厚切豬扒、酸甜茄汁、洋蔥菠蘿、拉絲芝士，就係焗豬嘅滋味組合！前排更有一間連鎖快餐店，將製作焗豬扒飯技藝入紙申請香港非物質文化遺產添！

焗飯可以千變萬化，除咗焗豬扒飯，焗茄汁牛脷飯同埋葡汁焗魚柳飯都係我嘅心水之選。不過點變都好，焗飯一定要多汁先好食，杰杰哋熱辣辣嘅醬汁絕對係焗飯嘅靈魂，佢可以保持食材濕潤，同時亦有保溫嘅效果。今次我將芋頭臘味煲變成臘味芋蓉焗飯，諗起滑滑嘅芋蓉汁配白飯，仲有秋冬初登場嘅臘味，這個冬天肯定不怕冷啦！

有朋友話芋頭唔好煮，炆得耐會散晒，煮唔夠時間口感硬實，下次可以試吓先蒸後煮，確保芋頭全熟又可以縮短烹煮嘅時間。將蒸熟咗嘅芋頭壓成蓉，再加花奶或者椰汁，就成為香滑嘅芋蓉汁，用嚟整焗飯或者其他芋頭菜式都得。靚芋頭最緊要夠輕身，質地乾代表芋頭夠粉，如果買啲已經切開咗嘅芋頭，留意愈多淡淡粉紫色幼紋嘅，就會愈軟糯香甜。至於臘味我就鍾意去西營盤鹹魚欄買，嗰度好多臘味店都係自設工場香港製造，款式多價錢又唔貴，秋冬季節不妨買定多啲放喺雪櫃，隨時都可以整臘味煲仔飯啦。

材料：

芋頭....................600g

去骨雞上髀肉.....150g

臘腸膶腸.............各1條

乾蔥頭.................1個

花奶.....................適量

蔥.........................1棵

白飯.....................2碗

醃料：

鹽...........1/4茶匙

粟粉.......1/2茶匙

胡椒粉...少許

調味：

鹽

做法：

1. 芋頭去皮去頭尾，對半切開，蒸20至30分鐘至熟（輕易用筷子戳穿為熟）。一半芋頭趁熱壓成蓉、餘下一半攤凍切粒。

2. 芋蓉逐少加入花奶直至成為芋蓉汁，加鹽調味。雞上髀肉去皮切粒，落醃料醃15分鐘，雞皮保留及切絲。

3. 臘腸膶腸切粒，準備蔥粒及乾蔥蓉，將雞皮煎至脆身出油盛起切絲，再落雞粒炒至半熟。隨即加埋臘腸膶腸粒炒至熟，加入蔥粒炒勻熄火。

4. 將臘腸膶腸雞粒及芋頭粒，加入芋蓉汁拌勻。倒入放上白飯嘅焗盤，再用200度焗爐焗10至15分鐘至表面金黃。最後，撒上蔥粒及脆雞皮絲完成。