聞西──蟹黃醬獅子頭 秋冬請客唔使愁

眾所周知，入秋後就係蟹季，雖然俗話有話「九雌十雄」，即係農曆9月應該食母蟹，10月則食公蟹。不過宜家氣候變化，加上人工飼養技術，即使嚟到11月中仲處處見到大閘蟹身影。我個人就唔係特別喜好食大閘蟹，可能上咗年紀怕食「寒」嘢，加上自己又唔係咁識食大閘蟹，仲曾經畀個侍應話我浪費咗隻蟹添，哈哈！

比起大閘蟹，蟹粉更得我心，蟹粉小籠包、蟹粉扒豆苗都係我好鍾意嘅菜式，但作為一個懶得剝蟹嘅人，蟹粉當然唔會自己拆啦！好彩市面上有預先包裝嘅蟹粉，留意當中係有分有調味同無調味嘅。生拆蟹粉要保存喺零下18度冰格，用之前提前解凍。另外有啲叫蟹黃醬嘅產品，已經調好味，亦唔需要冷藏（未開），通常用嚟撈麵撈飯。要留意蟹黃成分，部份產品會加入甘筍甚至雞蛋，都係嗰句一分錢一分貨啦！

今次用咗蟹黃醬做呢個「蟹黃醬獅子頭」，以清燉方式去煮，過往做獅子頭會用油炸去定形，今次嘗試用雲吞皮將肉丸包住，咁就無咁易散開，而且雲吞皮口感超滑非常驚喜！如果你鍾意手剁豬肉，最好叫肉檔畀豬後腿肉，再加三分肥肉，如果好似我咁買免治豬肉，就要揀包肥肉多啲嘅。整肉丸最緊要將肉碎攪並撻至起膠，肉質就會跟有彈性同埋唔會咁易散開。由於肉丸已經有調味，建議用純天然日式高湯做湯底，咁就唔會過鹹啦。

材料：

偏肥免治豬肉...............300g

已浸軟乾冬菇.................5隻

鮮淮山或馬蹄.................60g

小棠菜.........................12棵

雲吞皮.........................12張

蟹黃醬...........................50g

日式鰹魚湯包.................1個

醃料：

鹽...............................1茶匙

粟粉...........................1茶匙

紹興酒.......................2茶匙

胡椒粉....................1/4茶匙

做法：

1. 500ml水加入鰹魚湯包，用細火煮滾再焗15分鐘備用。2隻冬菇及鮮淮山切幼粒，小棠菜切去一半，菜葉洗乾淨。

2. 免治豬肉加入醃料後，用手攪撻至起膠。之後加入蟹黃醬拌勻，然後放冬菇及鮮淮山再拌勻。

3. 加入30ml鰹魚湯，再次用手攪撻至起膠，然後搓成三個肉球，雲吞皮用水浸幾秒至軟身。跟住大約用4張雲吞皮包住整個肉丸。

4. 準備燉盅，順序放入肉丸、小棠菜、冬菇，然後倒入適量鰹魚高湯。燉盅冚蓋，用中火蒸40分鐘就完成。