聞西──麻油菌香鴨飯 暖胃滋補確係盞

正所謂不時不食，呢句說話未必淨係適用喺瓜果菜，就以煲仔飯為例，雖然一年四季都有得食，但喺秋冬涼浸浸嘅時候食的確另一番滋味！煲仔飯好食不過唔容易煮，如果想食熱呼呼嘅有味飯，今次分享嘅「麻油菌香鴨飯」應該好啱你胃口！

一切要由麻油雞講起，麻油雞其實係台灣人嘅坐月湯水之一，主要有驅寒補身功效，可能太好味嘅關係，後來變成台灣嘅家常美食。麻油雞主要材料有麻油、雞、薑及米酒，亦會加入菇菌提升香度。中醫學裏面，米酒同薑性質都屬於溫和食材，適合體質偏寒容易手腳冰冷嘅人，食完之後有去寒保暖加強新陳代謝嘅作用。資料顯示麻油有益肝腎、潤五臟、填精髓、明耳目等功效，麻油亦含有豐富嘅不飽和脂肪酸，據講可以抗炎、抗氧化。

麻油雞飯可以話係麻油雞嘅簡化版，最特別係煮米嘅水量有一半用米酒代替，因此飯粒除咗有麻油香味，更有輕微嘅酒香，食完有種好暖胃滋補嘅感覺。放心，酒精一早已經揮發晒，大人細路仔食都唔會醉㗎！今次唔用雞試吓用鴨件，鴨嘅油香令飯粒更加油潤，不過燜嘅時間就要耐少少，鴨肉先會軟滑鬆化。煮麻油雞飯一般會用黑芝麻油，黑芝麻油採用重火焙炒製成，香味醇厚適合滋補料理，如果買唔到黑芝麻油，用普通麻油代替都可以，味道就會比較清新。菌香來自羊肚菌及牛肝菌，我認為搭配鴨肉比冬菇更合適。

材料：

鴨...................................半隻

乾羊肚菌........................10隻

乾牛肝菌..........................15g

杞子.................................15g

薑.....................................50g

米酒.............................200ml

水.................................200ml

麻油.............................4湯匙

白米.................................2杯

醃料：

生抽.............................4湯匙

蠔油.............................1湯匙

紹酒.............................1湯匙

胡椒粉......................1/2茶匙

做法：

1. 鴨件洗淨去除多餘鴨皮油脂（可以減少鴨嘅臊味），落醃料醃半個鐘。

2. 乾羊肚菌及乾牛肝菌用水浸軟，然後放入裝咗水嘅大盤，反覆幾次攪打去除泥沙，撈起揸乾水備用，杞子同樣浸軟。

3. 薑片煎香至出味盛起，放鴨件煎香，再落羊肚菌及牛肝菌，加熱水至材料表面。

4. 加入煎香嘅薑片，冚蓋慢火煮30分鐘。之後加入白米，米酒、水分及杞子，滾起後加入麻油，冚蓋慢火煮至飯熟就完成（留意水分唔夠可以再加）。

【小錦囊】

除咗平底鑊亦可用電飯煲代替，將煎好嘅薑同鴨件連同其他材料放入電飯煲，㩒個掣就搞掂，記得按電飯煲嘅刻度調節水分。