聞西──香煎芙蓉蛋 外脆內軟唔簡單

雞蛋應該係我哋最常用嘅食材。記得細個嗰陣家貧，好多時放學後嘅午餐都係豉油熟油撈蛋飯，嫲嫲會喺碗熱飯正中插入筷子攪拌兩吓，之後打隻雞落去，再加熟油豉油，然後叫我自己拌勻就食得。蛋漿包住飯粒口感順滑，又有豉油提鮮，最重要啲熟油其實係嫲嫲自己煉嘅豬油，呢碗飯嘅味道真係一世難忘。

另一味阿嫲煮得最多嘅餸就係蒸水蛋，有時會加肉碎鹹蛋黃或者加粉絲蝦米，結果都係好好送飯！好多年前我食過最好味嘅雞蛋，當時仲未發生禽流感，已故好友住喺西貢有自家嘅雞屋，養咗好多唔同種類嘅雞，每日送上源源不絕嘅雞蛋，啲蛋大細不一，有棕色、白式、赤紅色仲有灰綠色，蛋黃味真係超級濃，口感非常嫩滑，可惜發生禽流感後呢啲美味都成為過去喇。

每次去茶餐廳食飯，我都好鍾意叫芙蓉蛋飯，雖然好多人都覺得芙蓉蛋飯唔抵食，材料好似啲下欄嘢咁，不過每次上碟都係熱辣辣，蛋餅尤其邊邊嘅位好脆口，餡料因為有銀芽同蛋漿所以保持濕潤，做到外脆內軟嘅口感，當然要加埋甜豉油先至完美！我覺得芙蓉蛋一定要有叉燒銀芽蝦仁韭黃呢幾樣材料味道先算對辦，材料分量其實都幾隨心，有剩嘅材料可以留返嚟炒飯炒麵。記得煎嘅時候要用中火，油要多少少，蛋漿要加生粉水，咁先可以煎到外脆內軟，留意叉燒本身有鹹味，所以調味方面要輕手啲喇。

材料：（2人分量）

雞蛋......................................................4隻

銀芽、蝦仁、叉燒、韭王、蔥............適量（可以自由更換配搭）

生粉..................................................4茶匙

調味料：

鹽.............1/4茶匙

胡椒粉.....1/4茶匙

做法：

1. 叉燒切條，韭王及蔥切段，蝦仁背部𠝹開一刀去除蝦腸，落少少鹽、胡椒粉及生粉略醃。

2. 蝦仁及銀芽氽水30秒盛起瀝乾水分，生粉落2湯匙水開成漿，然後加入蛋漿及調味料拌勻。

3. 將銀芽、蝦仁、叉燒、韭王及蔥加入蛋漿拌勻。

4. 易潔平底鑊燒熱落油，倒入適量蛋漿材料，以中火煎至蛋餅成形，直至煎至金黃再翻轉煎另一面。最後淋上豉油就完成。