(荃灣葵青離島)泰拳教練 同大家打好人生擂台

正所謂：「人誰無過」，犯錯是人生中無可避免的，但你又有否想過「人生污點」可轉化成助人的契機呢？泰拳教練阿成的經歷就是如此。曾誤入歧途的他，現時盼望推廣揮灑汗水的手法與步法，從而以生命影響生命。

（當初）估唔到一個唔好嘅經歷都可以做到好事。 —阿成

小六吸毒中學輟學 20歲販毒判囚四年

阿成是更新人士，人生前半生與毒品打滾。他回憶起因接觸不良朋友而染上毒品，小學六年級時已被人發現吸食毒品，中學輟學後便進出黑社會，曾多次涉販賣毒品被捕，「當時每次都無事，罰下錢就算」，直至約20歲左右，被判監禁四年。

回想身處荔枝角收押所與壁屋的日子，阿成當時形容「好無助，見唔到前路」，也愧對每次花幾小時路程前來探望他的外婆。

藉泰拳助青年尋找自己。

//嗰下都唔知自己得唔得，自己都會標籤自己。//

在社工的勉勵下，阿成出獄後便於戒毒輔導中心工作，「嗰下都唔知自己得唔得，自己都會標籤自己」，14年來以過來人身份陪伴戒毒人士。阿成多年接觸不同個案，有人因重投毒品輕生，他亦有自責，「你成功咗咁多次，但係點解都係脫離唔到毒品呢個魔掌呢？」。但更多見證青年由10多歲「變壞」，又逐漸轉變正回正軌，「估唔到一個唔好嘅經歷都可以做到好事」。

阿成大約於2010年左右接觸泰拳，後來更考取泰拳教練牌照，他說泰拳讓他領悟到「人不可貌相」，尤其看到泰拳師傅技術高超，卻時刻都保持有禮，同時他學會收斂，不會亂動氣，「比賽打唔贏會諗點樣做好，唔會憤怒，而係去諗點解技不如人、有什麼要改進。」

不再執着過去，而是學會積極面對。

//人生路總有起伏，重要嘅係搵乜嘢方法去處理唔開心嘅事。//

阿成藉泰拳鼓勵青年要懂得自我追求，並見證他們在身體和心理的成長，「佢哋每次嚟我都會問佢哋得到啲咩」，青年也會開始顧及自身嘅問題，而非仇恨，「人生路總有起伏，重要嘅係搵乜嘢方法去處理唔開心嘅事；搵完毒品件事依然喺度，佢唔會解決到。」

除了針對青年，阿成也直言泰拳接觸了不同社區人士，例如婦女在參加前會看輕自己，覺得自己「幾十歲乜都做唔到」，不過練習了泰拳後卻能做到以前做不到的事，「以前8公斤都攞唔到，依家15公斤都攞到」。

從在邊緣縫上掙扎到成為他人生命的同行者，阿成希望社會首先能放下「有色眼鏡」，他認為每個人都會做錯事，更新人士與普通人的分別在於犯下錯的嚴重性，「要畀（佢哋）機會改變，否則愈行愈歪」。

阿成說練泰拳不會立刻「大隻咗」，但力量已無形地增強。

【建造業的緣份 做浪子「助拳人」】

拳館位於荃灣橫窩仔街工廈，阿成希望將之打造為青年相聚好地方，如社區中心那樣。拳館的設備都是二手的，阿成還記起當時與其他兄弟一起佈置拳館，「各自都有唔同技能，令到拳館加咗好多唔同嘅嘢」。

建造業工人來自「五湖四海」，每個人都有自己的故事，當中包括浪子回頭的篇章。有一次，阿成為香港建造業服務協會進行分享後，在該協會的協助下籌辦拳館。為了幫補生計，阿成曾在疫情時在地盤工作，再加上以前的經歷，因此他希望借泰拳，讓行內人士及其家人都能享受當中的樂趣，找到放鬆身心的方法，「運動係健康，健康就自然唔會去吸毒」。

介紹拳套，順帶談及不少因運動而戒毒的例子。