(沙田)A man and a pan 惜物惜福社區plan

在火炭一個面積只有七百尺的小工場裡，幾位老師傅與本地婦女正專心地翻新着一隻隻易潔煲，這裡就是「GRPan綠惜廚」的基地。他們以細心和巧手，將本應被丟棄的廚具賦予新生命，並將這份心意帶到社區。

我哋唔係淨係賣翻新服務，而係推動一種環保生活態度。 —Jason

//好多家庭都有磨損咗嘅易潔煲或者鑊，唯一出路就係丟去垃圾站。//

「好多家庭其實都有磨損咗嘅易潔煲或者鑊，唯一出路就係丟去垃圾站。其實佢哋唔知道，有啲係可以翻新番，幫到環保又慳錢。」「GRPan綠惜廚」聯合創始人Jason分享項目概念的初衷。「GRPan綠惜廚」主要提供易潔廚具翻新服務，費用視乎物料、大小及修復難度而定，由$120起。Jason指出，翻新的好處有三方面：「第一係環保，唔使下下堆填區；第二係慳錢，翻新一次100零到300蚊，通常都平過買新；第三就係食品安全，因為用咗耐嘅煲，塗層磨損後可能會滲出重金屬，對健康唔好。」

Jason坦言，這個創業念頭來自兩年前與拍檔的討論：「我本身對環保同sustainability好有熱誠。當時發現市面上冇人做呢樣嘢，覺得可以試下。」翻新工序繁複，需先拆除所有塑膠及木製元素，再進行打磨及噴塗等步驟，全程由工場內幾位師傅以人手處理。

落區收集街坊舊鑊，賦予廚具第二生命。

//其實都幾辛苦，一個禮拜平均做到100至150隻煲，唔算多。//

Jason笑言：「其實都幾辛苦，一個禮拜平均做到100至150隻煲，唔算多，希望未來可以加自動化設備，提升產能。」除了服務一般家庭客戶，該項目亦與餐廳、食品工場合作，處理大批翻新訂單，每次動輒二三十廚

具，對工場人手及能力都是挑戰。

Jason透露，目前有與順豐合作，市民可將家中的易潔煲送往全港約30間指定門店，由順豐集中送往工場進行翻新。「有時落街擺街站，畀街坊認識我哋個服務，都係想多啲人知道，其實唔需要丟掉，都可以有第二生命。」

在火炭工場，每日都處理數十隻「煲」。

//有資助計劃的支持，可以複製去其他地區。//

對於這項服務能否推廣開去，Jason充滿信心：「我覺得呢個係一個社會項目（Social Project），唔單止係做生意，而係幫社區。好多屋企未必捨得換新，如果知道有呢個服務，加上有資助計劃的支持，可以複製去其他地區。」

Jason參與多方合辦的「Future Ecopreneur Programme」。

【望大企業參與 理念走得更遠】

事實上，「GRPan綠惜廚」早前與紅磡社區客廳合作，為社區翻新超過50隻廚具，並舉辦教育活動，向街坊講解不同易潔廚具的分別及保養方法。Jason表示：「見到街坊咁有興趣，我都開心。最緊要係令大家明白，翻新唔單止係慳錢，而係對環境負責任。」

然而，要擴大規模並不容易。Jason指出，現時主要宣傳工作都由他一手包辦，既要處理工場日常運作，又要參與市場推廣，確實吃力。他希望未來有更多社區資源及大型企業參與合作，令這個理念可以走得更遠。

「我哋唔係淨係賣翻新服務，而係推動一種環保生活態度。」Jason語帶堅定地說。在一個講求快速消費的社會，Jason和「GRPan綠惜廚」默默提醒大家，「每一件物品都值得被珍惜，只要多一點心思，就可以延續使用，減少浪費，為社區及地球出一分力。」

到社區中心分享保養廚具的貼士，傳遞環保知識。