聞西──中式牛柳丼 最好梗係任裝

各地嘅飲食文化當然有自己嘅傳統同特色，正所謂一方山水養一方人，不過今時今日所謂傳統已經變得模糊。正如香港每年食米消耗量持續減少，反映飲食文化嘅基本改變，其實呢啲改變一直都存在，就好似日本人結合西方料理發展成「洋食」，至於同樣華洋集處嘅香港都有類似情況，就係「豉油西餐」喇！

舊時嘅香港唔係咁多人有能力幫襯正式嘅西餐廳，加上口味及飲食文化差異，於是出現咗一啲本地平民化西餐廳。當中，好多菜式都係中西合璧，又或者用粵菜材料配合西式煮法，例如瑞士汁雞翼、瑞士汁牛河、平民鐵板餐、港式羅宋湯、仲有今日嘅主角：中式牛柳。

先講中式牛柳個汁先，話明中式唔使問梗係有豉油啦，但其實主調味料都係西式的，當中有茄汁、喼汁、HP醬/OK醬等，HP醬/OK醬都係棕醬（brown sauce），一種源自英國同愛爾蘭嘅經典醬汁，顏色深褐，味道主要是酸，略帶甜、辛辣，亦係英式早餐常見嘅醬汁之一。至於牛柳我會買澳洲或者美國靚靚牛柳，記住醃料加入水分會令牛柳更加鬆嫰，加上逆紋切片及用刀背敲薄，根本就唔使落什麼梳打粉或者鬆肉粉！今次我將中式牛柳用丼飯形式呈現，最啱一人獨享！留意洋蔥同蕃茄唔使煮太耐，保持口感爽脆先好味，鍾意撈汁送飯嘅你不妨煮多啲醬汁啦！

材料：

牛柳..............200g

洋蔥...............半個

蕃茄...............半個

白飯...............一碗

蔥粒...............適量

醃料：

糖1/4茶匙、蒜蓉1/2茶匙、麻油1/2茶匙、粟粉1茶匙、生抽2茶匙、油1湯匙、水3湯匙

醬汁料：

茄汁3湯匙、喼汁1湯匙、HP醬1湯匙、糖1湯匙、生抽半茶匙、水5湯匙

做法：

1. 牛柳逆紋切成約1厘米厚片，放在砧板上用刀背敲薄兩面，將醃料拌勻後加入牛柳，用手略略按摩，然後放入雪櫃雪半個鐘。

2. 洋蔥切粗絲，蕃茄去籽切條，拌勻醬汁料，另外預備蔥粒。

3. 平底易潔鑊中火燒熱，落油將牛柳片煎熟盛起，留意無血水滲出就可以，以免過熟。

4. 爆香洋蔥，然後加入醬汁，微滾就加入蕃茄條及牛柳，輕輕拌勻令全部牛柳沾上醬汁就可以熄火並撒上蔥粒。最後，將牛柳鋪在飯面。