聞西──整懷舊蝦多士 厚過疊銀紙

方包細細夠晒啦、鋪上原隻大明蝦、放片芫荽美如畫、人人食過笑哈哈！估唔估到今次介紹係咩餸呢？佢係一個中西合璧嘅餸，上世紀五六十年代出現，聽講佢原本只係一個配角，通常會伴住油泡螺片油泡帶子呢啲名貴菜式，後來水鬼升城隍，深受食客歡迎已經可以獨當一面，之後仲成為酒席菜式添，佢就係蝦多士喇！

話明係懷舊菜，即係愈嚟愈少地方有得食，蝦多士唔係咩貴價菜，材料雖然簡單，但要好花工夫同心機，又要用原隻中蝦又要油炸，成本高回報低自然愈嚟愈少人做。取而代之嘅係另一種蝦多士，用蝦膠代替原隻鮮蝦，表面撒上白芝麻或者麵包糠，不過論口感同賣相，我認為遠遠唔及懷舊蝦多士！

蝦多士主要材料有蝦、去皮方包、脆漿，仲有純粹裝飾用嘅芫荽，主角當然係原隻中蝦，有次宴客我用咗花竹蝦，蝦肉鮮甜爽脆，顏色偏橙紅賣相真係一流，退而求其次可以用急凍白蝦。方包我個人鍾意用厚身嘅，白方包或者麥包都可以，記得放入雪櫃雪幾個鐘，等方包乾身啲炸出嚟就更加脆口！我會喺方包搽一層薄薄嘅蝦膠，增加口感得來又唔會太滯，另外用雞蛋及木薯粉做嘅脆漿可以固定蝦肉、亦都會加添一層脆脆嘅口感。學識咗以後想食蝦多士都可以自己整啦！

材料：

急凍白蝦..............8隻

急凍虎蝦仁........150g

厚方包..................4片

芫荽....................適量

木薯粉..................30g

雞蛋.....................1隻

麵包糠.................適量

調味料：

粟粉……1/2

茶匙鹽……1/4

茶匙胡椒粉……少許

做法：

1. 白蝦切去蝦頭，去殼去腸保留蝦尾後開邊，洗淨用廚紙印乾水分備用。

2. 方包飛邊後切半，準備8片芫荽葉，虎蝦仁連同調味料放入攪拌器打成蝦膠，再用匙羹攪拌至起膠。

3. 木薯粉加入蛋漿用打蛋器拌勻，每塊方包搽上薄薄一層蝦膠，然後放上白蝦。

4. 每件蝦多士表面掃上一層脆漿，再放一塊芫荽葉，灑少少麵包糠。然後燒熱油至150度，將蝦多士炸至兩面金黃就得，記得先炸蝦肉嗰邊。