聞西──家庭版辣子雞 無落味精照畀Like

作為一個嗜辣之徒，上年去過四川成都後，今年再下一城到訪重慶，上星期終於可以親身體驗兩地嘅辣有何不同。我會形容成都嘅辣比較體貼、細膩、有層次，而重慶嘅辣就係好直接同刺激，辣到入心入肺嗰種。

去到重慶當然要食重慶火鍋，事實上當地滿街都係火鍋店，就好似便利店咁行幾步就有一間，到處都瀰漫住辣辣火鍋嘅味道，想體驗重慶地道火鍋文化更加唔好錯過真正嘅防空洞火鍋，該店利用抗戰時期遺留落嚟嘅防空洞改造而成，長長嘅山洞放滿枱櫈，場面都幾震撼！更加震撼嘅係個紅油鍋底，一上枱已經超級攻鼻，同四川火鍋用菜油唔同，重慶係用牛油，令辣味變得好厚重、好持久，越煮越香，而且令辣味更加容易「掛」喺食物表面，我叫微辣，其實等於我哋嘅中辣囉。

今次用咗喺重慶買嘅辣椒乾同花椒，整咗個家庭版辣子雞。食辣子雞最過癮嘅地方就係要喺辣椒堆裡面翻找炸到乾酥嘅雞粒，當然有其他變奏版例如辣子蝦、辣子豬大腸等。我覺得呢個餸好食嘅重點係味精，所以點解今次叫家庭版辣子雞，自己煮就一定唔會落味精啦。為咗方便食，我用雞髀肉代替連骨嘅雞丁，再加埋重慶火鍋必備嘅午餐肉（因為我鍾意食，嘻），自己煮落乜都得，真正由自己話事！

材料：

去骨雞髀肉........................300g

午餐肉一罐........................200g

玉豆（可以唔加）................200g

辣椒乾（怕辣就落少啲）.......適量

花椒..................................3湯匙

蒜頭......................................6粒

薑粒..................................2湯匙

郫縣豆瓣醬....................11/2湯匙

油......................................1湯匙

粟粉..................................2湯匙

麻油....................................適量

蒜鹽....................................少少

醃料：

生抽..................................1茶匙

紹酒..................................1茶匙

蠔油..................................1茶匙

鹽...................................1/2茶匙

胡椒粉...........................1/4茶匙

做法：

1. 去骨雞髀肉洗乾淨後，用廚紙印乾並切細粒，加入醃料醃半個鐘。

2. 午餐肉及玉豆切粒，辣椒乾剪成粒及去籽，另外準備蒜蓉及薑粒。

3. 雞髀肉粒加入粟粉及油拌勻，再炸至金黃（用煎或氣炸鍋代替都得）。留意炸嘅時候要用返筷子將雞髀肉粒分開防止黏在一起，再將午餐肉及玉豆炸香。

4. 細火起鑊落油先爆香蒜蓉及薑粒，再落豆瓣醬炒出紅油。之後加入辣椒乾及花椒炒香，再將雞髀肉粒、午餐肉及玉豆回鑊，最後落適量麻油及蒜鹽炒勻即可。

【小提示】

郫縣豆瓣醬可以喺南貨舖或者電商平台購買，如果無就用普通豆瓣醬代替都得，不過香氣及味道就會打咗折扣。