聞西──免治牛肉煮粉絲 提你記得「食蟻瘦」

以前我屋企一家九口，每日諗今晚食乜餸都已經好頭痕，更頭痛嘅係買餸錢非常有限，要填飽九個肚簡直係不可能嘅任務！不過正所謂窮人多計仔，阿嫲自有佢辦法，就係每餐都有一個炆煮嘅餸，大大盤有肉又有菜，勁多汁好撈飯嗰種，就係咁樣養成我撈汁食飯嘅壞習慣（好肥㗎）。今次分享嘅餸：螞蟻上樹，同樣係低成本又大大碟之選。

螞蟻上樹其實係一味經典川菜，之所以有個咁特別嘅名，源自一個民間傳說。話說有個守寡婦人生活拮据下經常向肉攤賒帳，後來賒得太多，肉販每次只肯畀少少肉佢，唔夠食唯有將肉切碎再加粉絲一齊煮。點知家中老人家視力唔好，以為啲肉碎係螞蟻，婦人最後索性將呢個餸改名做「螞蟻上樹」囉。

螞蟻上樹講到尾即係肉碎煮粉絲，亦有一個較正宗嘅煮法就係肉碎同粉絲分開煮，今次我選擇後者嘅做法，除咗可以縮短煮粉絲嘅時間，粉絲會更加Q彈爽口，亦可避免粉絲煮到爛晒，啱晒唔太識控制火候嘅朋友仔。至於牛肉，刀工好又有心機有時間嘅可以用牛腿肉切成細丁，我就會用免治牛肉。呢個餸調味雖然有豆瓣醬，不過分量唔多所以只係微辣，唔食辣都可以用蠔油代替。我加咗啲甜椒粒增加口感，顏色賣相都好睇啲，記住就算平都要堅持「靚」㗎！

材料：

免治牛肉.......................200g

粉絲..............................100g

蒜頭................................3粒

紅色及橙色小甜椒......各1個

蔥粒..............................適量

醃料：

水................................2湯匙

生抽............................1湯匙

粟粉.........................1/2茶匙

調味料：

豆瓣醬........................1湯匙

糖................................1茶匙

紹酒............................1茶匙

煮粉絲料：

雞湯............................500ml

生抽............................1湯匙

油................................1湯匙

麻油............................2茶匙

做法：

1. 粉絲置大碗以冷水浸10分鐘後瀝水，免治牛肉落醃料拌勻，小甜椒切粒粒，另外準備蒜蓉及蔥粒。

2. 小鍋加入雞湯及煮粉絲料，滾起落浸軟咗嘅粉絲煮至透明，隨即熄火等粉絲吸收雞湯。

3. 冷鑊落油、糖、豆瓣醬及蒜蓉後，開慢火慢慢炒香。再加入免治牛肉炒熟後灒酒，用120ml雞湯加1/2茶匙黑醬油或老抽及1茶匙粟粉拌勻埋芡。

4. 粉絲撈起放在碟上，將甜椒粒加入肉碎拌勻。最後將肉碎淋上粉絲，撒下蔥花及少少麻油就完成。