聞西──半邊豆角炒魚鬆 致敬傳統脆味濃

港車北上的確方便咗好多香港人北上覓食，上個禮拜我先同好友揸車去咗一轉順德。星期五當日，6點放工立即出發，先喺珠海食飯過一晚，第二朝途經中山食農家菜，中午前已經到達順德。我住嘅民宿喺清暉園附近，行一分鐘就到步行街，即刻去食個順德最出名嘅雙皮奶先啦，呢度嘅雙皮奶係用當地嘅水牛奶做，口感細滑奶香醇厚，真係零舍不同。

我一向都覺得順德菜係實而不華，冇潮州菜咁精雕玉琢，又冇客家菜咁濃味，係嗰種會令人念念不忘嘅家常味。順德人煮嘢食最緊要係個「鮮」字，用簡單嘅調味帶出食材本身嘅原味。當地好興食生魚片、桑拿雞或豬（蒸氣鍋），另外作為魚米之鄉，順德人對魚嘅處理真係出神入化，一條魚可以起肉切片做魚生，魚嘴魚骨腩用嚟煎焗、魚頭魚尾拎去滾湯，連魚皮都可以做涼拌，一魚多食絕唔浪費！開心喺順德食咗鮮香順滑嘅拆魚羹、彈牙感十足嘅均安煎魚餅、大良炸鮮奶、好有鑊氣嘅炒陳村粉等等。

今次分享嘅食譜「半邊豆角炒魚鬆」都幾有順德菜嘅影子，靈感來自我喺中山農家菜食咗一個叫「手撕豆角」嘅餸。從未見過咁煮豆角，感覺非常得意，點知自己試做嘅時候發覺豆角完全撕唔開，拖咗水都唔得，最後惟有用刀將豆角逐條開邊。雖然要花啲時間，估唔到呢個做法令到豆角比平時更加爽脆，好驚喜！配角係切成條狀嘅煎魚餅，調味就用咗蝦醬同豆豉，鹹香惹味好送飯！

調味：

豆豉..........1湯匙

豉油..........1湯匙

蝦醬..........1茶匙

糖..............1茶匙

醃料：

栗粉..........1茶匙

麻油..........1茶匙

胡椒粉........少許

材料：

豆角...........250g

鯪魚肉.......250g

大紅椒..........1隻

蒜頭..............4粒

乾蔥頭..........1個

做法：

1. 鯪魚肉落醃料，用匙羹拌勻再用手「撻」至起膠。平底鑊落油，放鯪魚肉，用手或鑊鏟輕壓扁成約1cm厚魚餅，然後才開火，以中火煎至兩面金黃。

2. 豆角切成約12cm長度，飛水1分鐘撈起，用凍水沖洗降溫，然後逐條用刀開邊，大紅椒切幼條。

3. 魚餅攤凍後切幼條，另外準備豆豉、蒜蓉及乾蔥頭切片。

4. 冷鑊落油放入豆豉、蒜蓉、乾蔥頭及蝦醬，然後才開火，以中火爆香，加入豆角、大紅椒絲及魚餅條，轉中火炒至豆角軟身。最後加入豉油及糖調味，轉大火炒至焦香，熄火上碟。