聞西──小鮮肉酥餅 熱氣騰騰 欲罷不能

一聽到「行船爭解纜，月餅我賣先」呢句廣告宣傳，就知道中秋節快到喇！近年中秋月餅款式琳瑯滿目，而且好多愈嚟愈唔似月餅，對於老一輩嘅我，傳統蛋黃蓮蓉月餅仍然係我嘅至愛，其次係潮州芋蓉月餅，不過今個中秋我多咗一個新歡，佢就係上海鮮肉月餅。

之前旅行因為轉機，有兩個鐘可以喺上海走走，時間有限我選擇去食小籠包早餐，同團友人就去咗排隊買鮮肉月餅。孤陋寡聞嘅我，從來唔知道鮮肉都可以做月餅，原來鮮肉月餅早已經成為上海人嘅日常點心，於是唔執輸託朋友幫我買一盒試吓。朋友千叮萬囑要焗返熱嚟食先品嚐到鮮肉月餅嘅美味！返到屋企立即放入焗爐加熱，之後一口咬落去，嘩！好食到不得之了呀！酥皮又薄又鬆化、熱氣騰騰嘅肉餡肉香四射鮮味多汁！

參考咗鮮肉月餅嘅做法，今次做咗呢個鮮肉酥餅，整鮮肉月餅最困難嘅就係預備油酥皮，呢啲咁高難度嘅嘢我就唔會去挑戰喇，今次用咗現成嘅急凍手抓餅做餅皮，同樣有酥脆嘅效果，最緊要係方便簡單嘛！肉餡相對較容易，重點係要加入薑蔥水提香及去肉臊味，肉餡要攪拌及撻至起膠先會有緊實嘅口感。我將肉餡分成兩份，分別加入芫荽及榨菜，你亦可隨喜好加入鍾意嘅材料及調味。記住入口辣嘴就係食鮮肉月餅嘅最佳時機，相信嫦娥都會讚好味啦！哈哈！

材料：

3分肥7分瘦免治豬肉........300g

急凍手抓餅.........................3片

蔥........................................1棵

薑........................................3片

榨菜....................................20g

芫荽..................................適量

水......................................50ml

芝麻..................................適量

調味料：

胡椒粉.........................1/4茶匙

鹽.................................1/2茶匙

紹酒................................1茶匙

糖....................................2茶匙

蠔油................................1湯匙

生抽................................1湯匙

做法：

1. 將蔥和薑（連皮）洗淨，蔥切段、薑切片。然後放入攪拌器，加入50ml水打碎，再放入網隔用匙羹擠壓出薑蔥水。

2. 免治豬肉放入大碗，加入調味料後順時針方向用筷子快速攪拌均勻至起膠。之後分兩至三次加入薑蔥水繼續攪拌，等水分完全被肉餡吸收，然後用手撻至起膠，放入雪櫃雪1個鐘。

3. 肉餡分成兩份加入芫荽碎及榨菜粒拌勻，手先沾少少水，再搓成每個約30g嘅肉球。急凍手抓餅預先解凍至室溫，然後隔住油紙用刀將佢一開四份。

4. 取出1/4一片手抓餅，上面放上肉球，然後將餅皮用手指拉上包住肉球，再輕輕捏緊底部收口（確保唔會爆開就得）。之後，反轉放在油紙（部分肉餅撒上芝麻區分味道），熱鑊落多少少油，以慢火先煎肉餅底部定形，再將另一面煎至金黃，然後再翻轉冚蓋煎焗3分鐘後夾起，趁熱食啦。

【小貼士】

急凍手抓餅普通超級市場有售，個人認為台灣出品比較好，要選擇較大片裝，亦有唔同味道選擇，例如香蔥、蒜蓉等。