聞西──金黃酥脆棺材板 特厚多士裝白汁餡

今次介紹嘅美食有個恐怖嘅名叫「棺材板」，雖然聽落有啲大吉利是，其實佢係台南一款經典嘅美食！根據網上資料顯示，棺材板出現於50年代嘅台南，原本叫「雞肝板」，係由當地一名酒家老闆發明，佢受到西餐飲食文化影響，創作出呢個要用刀叉食嘅美食。佢將長方形嘅厚多士炸到金黃酥脆後，用刀喺頂部切開一個長方形嘅蓋，中間再挖空變成一個盒咁，之後倒入以雞肝、魷魚、牛奶等食材煮嘅白汁餡，最後放返個多士蓋上去。

雞肝板推出之後大受歡迎，食客戲言個多士蓋越睇越似塊棺材板，老闆就正式將呢款美食改名叫「棺材板」，後來當地人覺得棺材板有「升官發財」嘅寓意，甚至有學生考試前或者上班族面試前專登去食「棺材板」祈求好運添。不過而家嘅棺材板已經唔係長方形喇，而係改咗用更加容易製作嘅方形厚多士。

如果熟悉煮白汁嘅方法，呢個棺材板食譜可以話係手到拿來，不過大前提係一定要用特厚多士，咁先有足夠空間裝餡料，其次多士必須油炸先可以做到外酥內軟嘅效果。之後就係考驗你刀工嘅時候，要慢慢將個多士蓋切/起出嚟而唔可以爛！今次我用咗圓葉菠菜（做沙律嗰種）、洋蔥、煙肉、蝦仁做餡料（亦可以清雪櫃有乜落乜），加上濃稠嘅白汁口感非常濃郁順滑，再配埋酥脆嘅厚多士，真係有「板」你睇咁好味啊！

材料：

特厚多士...................2片

急凍蝦仁.................10隻

洋蔥........................半個

圓葉菠菜.................適量

本菇.........................89g

煙肉..........................3片

麵粉......................2湯匙

牛油.........................25g

牛奶......................200ml

上湯......................100ml

調味：

鹽及黑胡椒粉少許

做法：

1. 蝦仁洗淨抹乾開背、煙肉切段、洋蔥切粒。

2. 將特厚多士放入170°C左右嘅油炸至兩面金黃酥脆撈出瀝油（炸嘅期間要不時翻動）。之後，用刀喺頂部切開一個方形嘅蓋，中間再挖空變成一個盒（唔好挖穿個底呀）。

3. 煎鑊落少少油將洋蔥及煙肉炒香，跟住加入本菇、蝦仁炒熟，再放入圓葉菠菜炒至軟身，先熄火後落牛油與材料炒勻。

4. 倒入牛奶後再開中細火，慢慢攪拌避免黐底直至滾起，然後按個人喜好加入上湯調教濃稠度。再次滾起後，以鹽同黑胡椒粉調味後熄火，將適量餡料倒入多士盒中，最後放上多士蓋就完成。