聞西──泰式荔枝肉碎清湯 鹹中帶甜夠fresh

上星期舊地重遊泰國清邁。對上一次去清邁已經係多年前嘅事，宜家嘅清邁比以前繁華咗，多咗好多特色咖啡店、大型商場、唔同主題嘅市集，仲有好多畀網紅打卡嘅景點！不過最吸引我嘅都係清邁嘅泰北菜。

相對泰國其他菜系，泰北菜算係最唔辣，常用唔同種類嘅香草作調味，比較少用椰漿，主食就以糯米飯為主，再配搭泰北辣椒 醬或者小食送飯，菜式都比較簡單。講到泰北嘅美食代表，必屬Khao Soi泰北咖哩麵同泰北香腸莫屬，差唔多所有餐廳、夜市都食得到！受到鄰近雲南回族文化影響，泰北咖哩麵係少數有落椰漿嘅麵食，濃郁黃咖哩椰漿湯底超級香濃順滑，配上粗身蛋麵好掛湯，麵上面會加炸到酥脆嘅蛋麵條、雞腿，仲會附上鹹酸菜、紅蔥頭及青檸伴食，口感非常豐富！至於泰北香腸外形係捲埋一餅嘅香腸，免治豬肉加入紅咖哩、香茅、檸檬葉、南薑等香料做成卷狀香腸，通常會用炭火烤熟，香料味道非常重，肉帶微酸味，好容易會食過唔停口！

今次旅程去咗一間farmto table嘅泰北菜餐廳，佢哋所有食材都係採購自當地嘅小農，一方面保證得到最新鮮嘅食材，同時又可以提高農民收入，係一種雙贏嘅做法！我就試咗佢哋一款泰北清湯Gang Ngao，湯中加入水果紅毛丹提升鮮甜味，鹹中帶甜口感味清新，今次照辦煮碗，不過買唔到新鮮紅毛丹，改用咗罐頭荔枝肉效果都唔錯。

材料：

甘筍、青瓜仔、紹菜、鮮菇、芹菜、芫荽（保留根部）、蔥適量

（上述分量可隨意調整或改動）

免治豬肉...................................250g

罐頭荔枝肉...............................12粒

上湯或水..............................1,300ml

醃料：

泰國芫荽根蒜頭胡椒醬

（泰國雜貨店有賣）

糖.......................1茶匙

魚露...................1茶匙

做法：

1. 免治豬肉加入醃料醃15分鐘，甘筍、青瓜仔切厚片、鮮菇洗乾淨。

2. 紹菜切件，芹菜、芫荽、蔥切段。

3. 罐頭荔枝肉隔水，每粒荔枝肉釀入適量豬肉。

4. 上湯煲滾，先放甘筍片及芫荽根部煲5分鐘出味。然後加入荔枝肉丸、有剩嘅免治豬肉、青瓜仔、鮮菇及紹菜，水滾起計煮8-10分鐘。如有需要可用魚露調味。