聞西──糟辣椒薯仔炆排骨 白飯雪山咁高都告急

中國地大物博，每個地方都有屬於當地嘅醬料，例如喺貴州就有糟辣椒。糟辣椒係一種發酵醬料，主要用新鮮嘅紅辣椒、子薑、蒜頭，全部剁碎之後加入適量鹽、白酒，再放入罈入面密封發酵而成。「糟」嘅意思係指發酵，經過至少幾十日甚至過百日嘅發酵，罈裡面嘅辣椒就會產生一種好獨特嘅酸香味，口感酸辣鮮香，類似剁椒但帶種獨特成熟嘅酒香與酸味。

貴州有好多特色菜都係同糟辣椒有關，最具代表性有貴州十大名菜之一「糟辣魚」，將魚炸至外皮金黃酥脆，另起鑊炒香糟辣椒、薑、蒜，加入水、糖、醋等調味，再將魚回鑊燜煮至入味，最後打芡淋汁。糟辣椒就好似貴州人廚房嘅靈魂，但凡菜式落咗糟辣椒都會變成強大嘅「下飯菜」，有時甚至乎會直接用糟辣椒送飯，就好似我哋嘅腐乳一樣。

濕濕立立嘅天氣最啱食辣去除體內嘅濕氣，糟辣椒嘅酸辣鮮香更加令人胃口大開，就用佢嚟煮個貴州版薯仔炆排骨啦。今次將帶骨嘅腩排炸至金黃再炆，肉質更加鬆嫩香口，半融綿滑嘅薯仔都係主角，加埋吸汁能手椰菜及荷包蛋，呢個餸絕對可以叫做白飯殺手！糟辣椒我喺網上平台購買，有興趣可以試試找找。

材料：

肉排.......................1斤

薯仔.............2個約400g

椰菜.............1個約400g

蒜頭........................8粒

薑...........................數片

雞蛋........................2隻

蔥粒.......................適量

醃料：

胡椒粉.............1/2茶匙

紹酒.....................1茶匙

鹽.........................1茶匙

粟粉.....................1湯匙

油.........................1湯匙

調味料：

糟辣椒.................4湯匙（分量可按個人調整）

糖.........................1湯匙

生抽.....................1湯匙

陳醋.....................1湯匙

做法：

1. 排骨加入醃料醃半個鐘至1個鐘，薯仔切件、椰菜用手撕成大片。

2. 準備蒜蓉、薑米及蔥粒，將排骨炸至金黃，準備荷包蛋。

3. 熱鑊落多少少油先至落糟辣椒，然後加入蒜蓉及薑米爆香，落埋糖、生抽、陳醋炒香，再放排骨及薯仔炒勻。

4. 加入水分至材料表面，中細火炆20分鐘。準備另一個煲放上椰菜，倒入炆好嘅薯仔排骨，加埋荷包蛋，中大火煮5分鐘，最後落蔥粒就完成。留意椰菜會出水，想湯汁濃稠可以打個薄芡。