聞西──乾蒸蝦醬排骨肉嫩多汁 聽我講，一齊食硬

今晚凌晨4點你會做啲咩呢？相信呢個時間一般人都熟睡緊，不過有班人好特別，凌晨4點竟然走去排隊食排骨飯！咩排骨飯咁巴閉呀？原來係位於順德容桂一間叫「容邊排骨飯」嘅超人氣大排檔，咁點解要半夜三更去排隊呢？原來餐廳凌晨4:30就開門，營業至中午休息，難怪要咁早排隊，因為一開門已經座無虛席！

呢個乾蒸排骨係名副其實嘅乾蒸，一滴水都冇落，燒紅嘅鐵鑊溫度可以達到300度，就好似焗爐一樣，高溫令到排骨嘅外表焦香，同時逼出油脂及鎖住肉汁，令到排骨多汁肉嫩，仲帶有陣陣烤肉嘅香味，碟底嘅餸汁拌隨住香噴噴嘅豬油最啱用嚟送飯！不過用鐵鑊整乾蒸排骨都有危險性，因為高溫嘅鐵鑊遇到油好容易着火，喺屋企就唔太適宜試喇，所以我用焗爐代替。

我冇嵌入式嘅焗爐，所以做唔到300度高溫，普通家用焗爐最高大約250度，實際可能冇咁高添，惟有稍微延長焗嘅時間，出嚟個效果都唔錯！主角排骨唔可以太瘦，要揀帶有脂肪嘅，調味料就悉隨尊便啦。今次我用咗定居泰國曼谷嘅表姐送我嘅泰國蝦醬，我覺得泰國嘅蝦醬味道冇咁濃烈，唔係太鹹但係鮮味十足，用嚟醃排骨真係一流！另外加咗南瓜粒可以平衡蝦醬嘅鹹味。記得用一隻耐熱嘅碟，出爐嘅時候貼住碟嘅肉會發出「滋滋」聲，絕對係美食嘅愛的呼喚啊！

材料：

排骨..........................................380g

南瓜..........................................150g

日本白飯魚仔（可以唔加）........20g

薑.................................................3片

蒜頭.............................................3粒

蔥.................................................1棵

紅椒（可以唔加）.......................2隻

粟粉.........................................2湯匙

糖.............................................1湯匙

油.............................................2湯匙

調味料：

泰國蝦醬............................1湯匙

糖.......................................2茶匙

玫瑰露............................1/2茶匙

油.......................................1湯匙

水.......................................1湯匙

做法：

1. 排骨洗乾淨，加入2湯匙粟粉、1湯匙糖拌勻，再加入一碗水，用手按摩排骨揸出血水及雜質，再浸泡15分鐘。

2. 準備薑絲、蒜蓉、紅椒粒、蔥白粒及蔥粒。南瓜切件、泰國蝦醬加入1湯匙油、1湯匙水及2茶匙糖拌勻。

3. 撈起排骨揸乾水份，先加入蝦醬及玫瑰露拌勻，再落薑絲、蒜蓉、紅椒粒、蔥白拌勻。

4. 加入白飯魚仔及南瓜並用2湯匙油拌勻，再將材料置於碟中，以250度上下火預熱焗爐，放入排骨焗20分鐘，最後撒上蔥粒就完成。