聞西──嫩雞煨麵 夠味好掂 咬落冇彈牙都係冇得彈

相信每個人都有屬於自己嘅治癒系食物，可能係一件濃郁嘅朱古力蛋糕，又或者係一碗叉燒飯，而我嘅治癒系食物就係即食麵，記得細個嗰陣經常好恨食即食麵，不過阿嫲話無益所以好少煮，唔知係咪因為阿嫲想我戒甩個即食麵癮，每次都會煮到啲麵腍啤啤咁……

一般人食麵都鍾意彈牙嘅口感，不過上海菜中有一款叫嫩雞煨麵嘅麵食卻反其道而行，麵條要煮到軟而不爛先叫好，有時仲會將麵剪斷，方便用匙羹食連筷子都慳返。我第一次食嫩雞煨麵確實有啲反差感，奶白色嘅湯頭、白色嘅上海幼麵加埋簡單嘅青菜雞肉配料，望落去好似好清淡，原來清淡係假象，實則超夠味。湯頭係鮮甜濃郁嘅雞白湯，質感有啲似麵線但無咁杰，入口順滑食得舒服。

煨麵重點係用湯底直接煮麵，麵仲要專登煮耐啲，等當中嘅澱粉融入湯頭形成濃稠嘅質感，膨脹咗嘅麵又盡吸雞湯嘅鮮味，做到湯中有麵、麵中帶湯。傳統上會用雞殼豬骨做湯底，所以湯底會呈現乳白色。為求方便都可以用現成雞湯加牛奶、豆漿甚至淡奶造成白雞湯效果，而我就用咗雞髀加金華火腿自製雞湯。留意新鮮嘅上海麵表面會沾咗好多麵粉，最好預先用滾水拖一拖除去麵粉，否則湯底會變到好杰。如果用乾麵條就可以直接放落湯度煮，麵條嘅軟硬度就按自己嘅喜好調整啦！

材料：

雞髀.........................兩隻

上海麵...............1個150g

小棠菜....................150g

金華火腿...................40g

豆漿......................100ml

鴻喜菇....................150g

薑...............................4片

水.......................1,000ml

做法：

1. 雞髀洗淨落少少鹽醃一陣，金華火腿及薑切片、1,000ml水加入金華火腿及薑煲滾。再放雞髀冚蓋滾起轉細火煮30分鐘。

2. 小棠菜洗淨切碎，將雞髀撈起攤凍之後手撕起肉備用。

3. 上海麵用滾水拖一拖後撈起。雞湯加入鴻喜菇、上海麵及小棠菜煮4分鐘或按自己喜歡嘅軟硬度調整時間。

4. 加入豆漿，煮到再次滾起，加入雞肉拌勻，最後落鹽及胡椒粉調味就完成。