聞西──泰式炸蟹鉗 墨魚蝦膠撈得好掂

人到中年除咗呢度痛嗰度痛之外，去「大酒店」嘅機會多咗，參加婚宴嘅機會就愈嚟愈少喇！對上一次參加婚宴已經係年多前嘅事，晚輩結婚，單人匹馬去到，左右都係陌生人，好難先捱到散席，最令人失望係千篇一律嘅婚宴菜式，食之無味。

以前社會物質未如今日豐裕，酒席菜用料唔太上乘，更多係手工同心機搭夠！細個去「飲」見到有炸蟹鉗真的好興奮，就好似一粒巨型珍寶珠，外面包住一層金黃酥脆嘅麵包糠，裡面係新鮮彈牙嘅蝦膠，我鍾意用手揸住隻蟹鉗嚟食。不過到宜家我都仲有啲疑惑，點解炸蟹鉗裡面冇蟹肉嘅？蟹鉗啲肉又去咗邊呢？

整炸蟹鉗當然要有蟹鉗，今次用咗超市買嘅急凍蟹鉗，價錢唔平但一盒有好多隻，用剩留返下次都得。如果買到新鮮蝦整蝦膠是最好的，用急凍代替就冇咁彈牙爽口juicy喇，整蝦膠千祈唔好用攪拌機，用刀背剁先可以保留蝦肉嘅纖維，咁樣會好食啲㗎。參考好多食譜都有加入墨魚膠，試咗，個人認為口感實淨啲，我都係鍾意淨係用蝦膠多啲。另外包好蟹鉗之後要放落雪櫃雪半個鐘定形，上粉時就更加容易控制。今次加咗泰式元素，少少辣又有啲檸檬葉嘅清香，食落一啲油膩感覺都冇！偶然試吓換個調味，可能會有意外嘅驚喜呢！

材料：

蝦仁200g、墨魚膠100g、急凍蟹鉗8隻、檸檬葉4片，指天椒2隻、雞蛋2隻、麵包糠及麵粉適量

調味料：

鹽1/4茶匙、魚露1/2茶匙、粟粉1茶匙、胡椒粉少許、泰式辣醬1茶匙

做法：

1. 急凍蟹鉗用廚紙印乾水分，檸檬葉及指天椒切碎備用。

2. 刀背剁成蝦膠，將蝦膠及墨魚膠撈勻，加入調味料、檸檬葉及指天椒碎拌勻。

3. 用力將混合蝦膠撻至起膠，撻得愈勁炸出嚟嘅蟹鉗就會愈彈牙、愈有空氣感，蟹鉗撒上適量粟粉，將混合蝦膠包住蟹鉗（包蝦膠時雙手可以沾少少水防黏方便造型），放入雪櫃雪半個鐘定形。

4. 將釀好嘅蟹鉗順次序沾上蛋漿、麵粉、麵包糠，再重複上述步驟一次，用150℃油溫慢慢將蟹鉗炸熟至金黃撈起。之後再提升油溫至170℃快速再炸一次迫出油分，撈起瀝油後就完成。