聞西──陳皮鴨腿湯飯 嗰陣甘香 好duck不平凡

俗語有云：一両陳皮一両金，百年陳皮勝黃金。早知我細個嘅時候就曬定多啲果皮，放到今時今日都已經變成三四十年嘅陳皮，咁就發達啦，可惜呢個世界無早知囉！以前家住舊式公屋，有個騎樓平時會用嚟曬衫，每逢秋高氣爽嘅日子就會多咗一個功能，就係曬果皮。阿嫲每年都會曬果皮，將新鮮柑皮整齊串起，然後掛喺騎樓有太陽嘅地方晾曬，亦會將儲喺餅乾罐嘅陳皮攞出嚟翻曬，原來曬過嘅陳皮冇咁容易發霉。

前排有機會到訪新會呢個陳皮之鄉，梗係要感受一下陳皮嘅味道啦！第一站去咗新會古井鎮食平香燒鵝，呢度嘅燒鵝醃嘅時候會加入陳皮，所以食落有陣果香味㗎！第二站去咗新會陳皮村，裡面有個陳皮文化館，介紹好多關於陳皮嘅知識同展品，更多嘅係賣陳皮同周邊產品嘅舖頭。最正宗嘅新會陳皮，係用大約喺農曆立冬至冬至前後採摘嘅大紅皮柑製成，我就買咗十五年梅江大紅皮，色澤烏黑沉實香味甘醇，用嚟煮陳皮鴨腿湯飯一流。

出街食嘅陳皮鴨腿湯飯，梗係唔會用到咁靚嘅陳皮啦！通常做法鴨腿會先走油，再加入上湯同其他材料蒸燉幾個鐘，所以湯頭會較清，今次家庭版嘅做法只要一個鐘就搞掂。喺凍肉店買到急凍鴨腿，大大隻都係十幾蚊好抵食，以煎有代炸迫出鴨油去除鴨騷味。冬瓜唔去皮再加埋蓮子就更消暑，煮過嘅鴨腿肉質仍然鮮嫩，陳皮味道甘香，滋味十足！

材料：

冬瓜...............800g

急凍鴨腿...........2隻

陳皮............1至2片

冬菇..................4隻

瑤柱.................30g

蓮子.................29g

薑......................4片

芫茜..................1棵

水...............1.5公升

醃料：

紹酒.......................2茶匙

黑醬油或老抽.........1茶匙

鹽......................1/2茶匙

五香粉................1/4茶匙

胡椒粉......................少許

做法：

1. 急凍鴨腿解凍後切去多餘脂肪（可減少鴨騷味），然後落醃料醃1個鐘，陳皮、冬菇、蓮子用溫水浸軟。

2. 冬瓜去瓤、切成件不用去皮，芫茜洗乾淨切碎，保留芫茜根，另外準備薑片。

3. 將醃好嘅鴨腿用廚紙印乾，熱鍋落少少油，放入鴨腿慢火煎至兩面金黃色盛起。1.5公升水煮滾，放入陳皮、冬菇、蓮子、芫茜根及薑片。

4. 放入鴨腿及剩餘嘅醃汁，冚蓋以中細火煮30分鐘，之後加入冬瓜件再煮30分鐘（避免冬瓜煮到太爛）。如需要可以落鹽調味，最後落埋芫茜碎準備白飯就食得。

【小貼士】

1. 靚嘅陳皮係唔需要刮囊㗎，10年以上的靚陳皮，白囊已經充分陳化唔會帶苦澀味，仲具有健脾胃功效㖭。

2. 冬瓜連皮煮，可以大大增強利水消腫同清熱解毒嘅功效。