聞西──娘惹豆醬雞 薯仔冬菇分高低

香港通街都係泰國菜、越南菜，大家又有冇聽過娘惹菜呢？如果你曾經去過新加坡或者馬來西亞，可能無意中都接觸過娘惹菜，例如街邊糖水檔賣嘅摩摩喳喳，餐廳酸酸辣辣嘅阿參魚、參巴醬配椰漿飯，又或者各式種類嘅娘惹糕點等。

話說娘惹菜起源自15世紀初至17世紀間，當時已經有華人移民去馬來西亞、印尼等地「搵食」，落地自然生根。佢哋同當地人結婚生咗小朋友，當地人會叫佢哋做「峇峇娘惹」，即係男仔會叫峇峇，女仔就叫娘惹。呢群移民後代漸漸發展出一套中國傳統烹調同馬來香料世界嘅fusion飲食文化，由於傳統峇峇娘惹家庭多由女性負責煮食，後來「娘惹」就成為咗佢哋菜系嘅統稱喇。

娘惹菜嘅特色就係中式烹調混合各種東南亞香料及「椰香」。當中，經常會用到南薑、香茅、蒜、乾蔥、辣椒、等香辛料，亦常用到椰漿、椰糖、蝦醬、魚露等當地食材。我最熟識嘅娘惹味道就係阿參醬，充分體現娘惹菜酸、辣、甜、鹹嘅風味，用嚟煮海鮮一流！其實娘惹菜都有唔辣嘅選擇，例如今次分享嘅娘惹豆醬雞，佢係一道好傳統嘅娘惹家常菜，有啲似我哋嘅薯仔炆雞同冬菇炆雞嘅混合體，以鹹香豆醬同濃稠嘅黑醬油調味。另外加入椰糖令味道更平行，醬汁甘香帶甜好好送飯，吸晒味嘅冬菇同薯仔真係好食得過分！如果接受到香料嘅味道，可以加少少八角同桂皮提香，有呢個餸記得煮多啲白飯啊！

材料：

雞下髀.....................6隻

大冬菇.....................4隻

薯仔....................1至2個

蒜頭.........................6粒

細乾蔥頭..................8粒

普寧豆醬...............2湯匙

椰糖......................2湯匙

黑醬油..................2湯匙

八角.........................1粒

桂皮......................1小枝

醃料：

鹽............................1/4茶匙

胡椒粉....................1/4茶匙

黑醬油.......................1茶匙

油...............................2湯匙

做法：

1. 雞下髀切半，沖洗乾淨去除血水，用廚紙抹乾後落醃料醃半個鐘。

2. 預備蒜蓉及乾蔥蓉，冬菇浸軟切件，薯仔去皮切件後煎至表面金黃備用。

3. 易潔鍋落油先爆香蒜蓉及乾蔥蓉。然後加入雞下髀煎至金黃，跟住加入八角、桂皮、椰糖及普寧豆醬（要將豆粒壓爛）炒香。

4. 落黑醬油及冬菇炒勻上色，加水至蓋過材料表面，滾起冚蓋中細火先煮15分鐘。然後加入薯件再煮15分鐘，最後落鹽調味。

【小貼士】

椰糖可以喺泰國雜貨店或者東南亞雜貨店買到，分乾同濕兩種。我覺得濕椰糖較容易使用，不過開封之後就要放入雪櫃儲存。