聞西──紫蘇乳鴿煲 溫補驅寒搶晒Fo

我嘅旅遊飲食策略一向係去到邊食到邊，俗語有話冇計劃就係最好嘅計劃，比如北上覓食，我會先定好目的地，去到當地再開個「點評」睇吓附近有乜嘢食。通常會避開啲網紅店，最緊要係參考一下啲「真實」評價先做決定，最近畀我喺中山搵到一間「食鴿」私房菜，呢餐真係超有驚喜！

我就係畀佢個「鴿吞翅」（亦叫做仙鶴神針）吸引到！呢個鴿吞翅喺用咗已經去骨嘅乳鴿釀入魚翅，再用鮑汁燜煮，上菜時服務員會用鉸剪剪開鴿肚，瞬間飆汁，魚翅同香味即時湧出，鴿肉嫩而不爛，沾滿鮑汁食非常好味！另外再試埋鴨吞翅湯，湯頭濃郁鮮香！真心多謝廚師將全隻乳鴿去骨，啖啖肉食得好暢快啊！

其實乳鴿除咗紅燒仲有好多種煮法，但係要買到真正嘅「乳鴿」真係唔容易。我睇過凍肉公司嘅貨色完全買唔落手，後來總算搵到間有賣冰鮮嘅，不過體型似中鴿多過乳鴿，唯有靠香味搭救！今次用咗紫蘇葉配以鹽焗雞粉及黃薑粉等醃製嘅乳鴿做成煲仔菜，未開煲蓋已經聞到非常之香，紫蘇同乳鴿嘅滋味完美結合。資料顯示紫蘇葉可以溫補驅寒、增強免疫力、調理氣血等功效，作為一個入秋嘅菜式非常適合，可惜我買嘅乳鴿一啲都唔「乳」，肉質同嫩滑有啲距離，下次會試吓用雞件代替應該都唔錯嘅。

材料：

乳鴿.................2隻

紫蘇葉............適量

蒜頭................適量

薑....................適量

乾蔥頭............適量

燒酒...............50ml

醃料：

鹽焗雞粉.......1湯匙

油..................1湯匙

豉油..............2茶匙

粟粉..............1茶匙

鹽..................1茶匙

薑蓉..............1茶匙

黃薑粉.......1/2茶匙（可以唔落）

做法：

1. 乳鴿切去頭頸及尾部，洗乾淨後一開四斬件，用廚紙抹乾，落醃料醃至少兩個鐘或醃過夜

2. 準備料頭：蒜頭、薑及乾蔥頭（多少自己調整），紫蘇葉洗淨切段

3. 用中火將乳鴿煎至表面金黃，另備砂鍋燒熱落油爆香料頭

4. 加入紫蘇葉，然後放入煎醃好嘅乳鴿，倒入燒酒立即冚蓋，轉細火焗15分鐘。之後用筷子插入乳鴿最厚肉嘅大腿內側，如果拔出後流出血水就要再焗多一陣喇